科技男手記

Pink by Yellowglen

2009-02-16T11:47:00.006+08:00

科技男一向對飲酒冇乜要求, 連$39.9一支嘅紅酒都可以入口. 情人節想攪下氣氛, 就去百佳買支"香檳"慶祝. 不過當然唔會駛幾佰蚊買支Moet&Chandon啦, 諗住粉紅色嘅sparkling wine比較有情調, 於是用$79買咗支Pink by Yellowglen.

一入口, 甜甜地當"鹿仔香檳"咁飲都OK. 不過聞兩聞, 就覺得啲氣味怪怪地. 再飲真啲, 點解會有陣"嘔奶味"???望下個酒樽, 寫住"...produced with the aid of milk and fish...". 冇人知點解sparkling wine要用奶同魚去做, 我淨係知道下次再買, 都係買返Jacob's Creek或者Wolf Bass比較穩陣. (大家都係幾十蚊貨仔開心下)

原來買酒飲, 唔單只要睇年份同用乜嘢grapes嚟做, 記住要睇清楚有冇用其他"添加劑"!

新年快樂

2009-02-02T10:14:00.003+08:00

新一年新開始, 希望大家牛年行好運, 最緊要身體健康.

過年前收到不幸既消息, 就係科技男一個朋友突然患上急病, 搞到要係醫院過年. 我除咗希望佢吉人天相之外, 亦希望大家支持骨髓捐贈計劃, 幫助有需要嘅人.

依件事令我感覺到, 人年紀越大, 最重要嘅並唔係金錢, 而係健康同身邊嘅親朋好友. 當然, 科技男仍然會買下六合彩, 發夢有架法拉利揸下. 不過如果話比你聽你得返幾日命, 你會想買跑車買名牌, 抑或同屋企人食多餐飯呢? (新正頭講啲咁嘅嘢, 大吉利是...)

總之今年經濟肯定唔會好, 大家為工作金錢苦惱之餘, 請不要忙記身邊嘅人和事. 世界上有無數比我地不幸嘅人, 所以唔好自怨自哀, 亦無需過份悲觀. 正所謂有危就有機, 科技男就希望下半年買下樓同趁低吸納股票, 依家就要專心工作同讀書, 努力儲錢.

偷懶

2007-11-29T16:50:00.000+08:00

成個禮拜冇寫過blog，皆因新工作比較忙，好多嘢要pick up．其實依度都冇乜人睇，我諗冇讚者會投訴呱！？

依家手頭上嘅工作唔其實唔算多，不過工作嘅性質同以前唔同，要花啲時間去習慣．好似成日要打電話同sales update吓啲客嘅進度咁，一般人可能駕輕就熟．不過科技男以前枱頭個電話擺多過用，同sales周旋嘅技巧就有待改進．依家唯一一樣我可以在十分鐘完成到嘅事，就係pack sample寄比客，哈哈．

峇里島之旅－飲食

2007-11-22T21:19:00.000+08:00

今次到峇里，有很多時間都在酒店用膳．其實酒店餐廳的水準也不錯，不過選擇較少和不便宜(午餐每人大約HK$150，晚餐每人需約HK$300)．

Cheeseburger作午餐：

雖然出發前粗略地搜集了幾間當地出名的餐廳，不過由於手上沒有地圖，到了峇里島只有亂找一通．第一天晚上，我們到了Kuta Beach的Poppies吃晚餐．Poppies在Kuta有兩間分店，就是Poppies I跟Poppies II．在大街上問路，當地人都會叫我們去Poppies I，後來發現這一家原來是"元祖"店，可能因此大家都會推荐Poppies I吧．Poppies食的就是"國際菜"，就是西餐跟印尼菜都有．第一次到印尼，當然要試試印尼菜，於是我們就點了一個二人份的印尼拼盤，蠻不錯！

Poppies的印尼拼盤：

第二天晚上，原本想到酒店右邊的"大排檔"食海鮮，不過不明所以地摸門釘(難道星期日休息?)，貪方便到了另一邊的洲際酒店，順便參觀一下．洲際酒店真的很大，不過好像在酒店用餐的人不多．酒店餐廳的海鮮BBQ不錯，不過價錢也真的昂貴．

第三晚又回到了Kuta Beach，今次吃意大利餐．點了海鮮Pizza、沙律和煎沙甸魚．味道不賴，價錢亦竟然是今次峇里之旅中最便宜的．餐廳名了沒有記下，不過就在Kuta大街上，對著沙灘，在McDonald附近，門口有一排排白色的沙發的就是了．

第四天我們到了Ubud作半天遊．下午在Ubud中心的皇宮下車後，找到了Cafe Wayan，是一間印餐廳(不過為什麼峇里的印尼餐廳都有賣西餐？)．餐廳的佈置就是一個小花園，令人坐得很舒服．我們點了蘑菇汁crepe跟芝士煙肉爙雞扒，味道很好而且不貴．

大金柚一個：

Cafe Wayan一景：

Ubud的梯田：

晚餐又再想吃BBQ，我們原本打算到Jimbaran的Sharkey's，因為好像在Internet聽過這個名字．後來司機說有一家叫Blue Marlin的，說比較好吃云云．我們不虞有詐，便改到按司機所說到餐廳．Jimbaran的日落真的十分美麗，坐狂沙灘上吃晚餐本是賞心樂事．不過當我們發現四周都是日本人和外國人的時候，便心知不妙．果然餐廳所謂的海鮮，都是死得發白，而且價錢貴得離譜．我們點了四隻King Prawn、1kg Red Snapper、1kg Mussel、一個椰青及一小支啤酒，埋單就要六佰幾港幣！味道之差亦不能接受，所有海鮮上面都有一些辣的茄汁，想必是用來遮掩海鮮的不新鮮味道吧．到Jimbaran吃海鮮，有種被坑了的感覺．要吃海鮮，還是乖乖的留在香港好了．

Jimbaran沙灘的夜景：

記住這間餐廳！(不過我想Jimbaran其他所謂的海鮮餐廳不去也罷)

大部份Jimbaran的餐廳都有舞蹈表：

峇里島之旅－住宿

2007-11-20T16:40:00.001+08:00

今次到峇里島六天都住在西部Jimbaran Bay的同一間酒店Jimbaran Puri Bali．原本打算訂隔壁的Intercontinental，因為在tripadvisor上看到Intercontinental得到一致好評，可惜酒店已經full house．其實圍繞著Jimbaran Bay的還有Ritz Carlton和Four Seasons，不過訂房的時候阿里巴巴還沒有上市，要不然一定豁出去！

那為什麼還要堅持住在Jimbaran呢？其實峇里島的住宿，還有Nusa Dua以及Ubud這兩個熱門地點．Nusa Dua是在東面的海灘，沿岸有一埋名牌酒店例如Westin、Sheraton、Conrad等等．不過我想當然地以為西面的Jimbaran面向著印度洋，景色一定比較優美．今次旅程中並沒有到過Nusa Dua，不過租車司機說Jimbaran比Nusa Dua好就是了．至於Ubud這個內陸地區，散佈著很多以養生為主題的resort hotel，就是那種在山林中做瑜珈食有機餐的東東，酒店價格亦是峇里島上最昂貴的．不過因為科技太一句：「為什麼付了錢卻不能住在沙灘旁邊？」而打消了住在Ubud的念頭．

每個房間都是獨立的bungalow：
酒店泳池一景：
每朝吃早餐的地方：

屋外有一個私人小花園，有一個花洒頭，不過作用不大：

浴缸一個．浴室的落地玻璃沒有窗簾，每晚都有沖天體浴的感覺．．．．．．

酒店沙灘可以遠望到山上的Ritz Carlton和Four Seasons，晚上有點像希臘的Santorini：

每天就在沙灘享受日光浴和看書：

酒店旁的餐廳，不過當日碰巧摸門釘：

在酒店餐廳吃的印尼炒飯：

峇里島之旅－感覺

2007-11-17T21:12:00.000+08:00

今次到峇里島旅遊，主要是因應科技太之要求－－Relax，因此先前並沒有做太多資料搜集之類的功夫，心目中的旅遊模式就好像上一次到泰國喀比一樣，整天就圍著大海只有食飯和睡覺．出發前只有調查過三個活動的細節：河道激流、海島浮潛以及烏布(Ubud)一天遊．結果前兩者都沒有做到，最後只到過烏布作半天遊．雖然每天躺在太陽底下動也不動不是每一個都受得了，不過一本好書加一個美麗的海灘，可以令時間過得特別快．

不得不提的是峇里島的消費真的很昂貴，雖然一早就已經有「遊客就是待宰的小羔羊」的心理準備，不過還是被種種物品的價格所嚇呆．另外只要有日本遊客到的地方，彷彿就會有騙子出現，專向黃皮膚黑頭髮的人下手，而峇里島亦不例外．不過他們遇到的卻是兩個「見慣世面」的香港人，比起泰國人而言，印尼人的手段就顯得有點幼稚了．

峇里島其實只是印尼其中的一個小島，不過汽車的數目確實有點驚人，由酒店到Kuta海灘的路程只有十多公里，不過路面擠塞的程度，足以令汽車要三十分鐘以上才能走完．而且峇里島好像沒有對騎機車設下什麼限制似的，因此在路上可以見到很多穿著校服，樣子似初中生的學生在騎電單車放學．

我想峇里島這個地方，去一次便已經足夠．因為在這個地球上有陽光與海灘的地方多的是，而且峇里島的物價實在令人想著：「這個印尼炒飯甚麼比起香港食到的還要貴」，因此下次想要曬太陽聽聽海風，我會毫不猶豫的選擇泰國或者菲律賓的海灘．

返來喇

2007-11-17T20:52:00.000+08:00

去咗峇里島六日，只有食同埋瞓．每一日九點幾先起身，食完早餐就坐响沙灘曬太陽同睇書，結果變咗舊炭．

間酒店有個library，有好多法文德文日文書，英文書算比較少，多數都係小說．我好少睇fiction類嘅書，不過比我發現咗本叫《The Seven Year Itch》嘅書．本書都幾新淨，個書名又幾得意，就係咁比我攞咗嚟睇．個故仔好簡單，講兩公婆點樣面對不同嘅誘惑．不過(兩個)作者寫得好好笑，簡直睇到我唔停得手，大家不妨買/借嚟睇吓．

希望在明天

2007-11-09T11:45:00.000+08:00

做咗一個禮拜marketing，開咗兩日會，整咗一份sales package嘅powerpoint同一份press release．硬哽咗一埋book/bill/backlog之類嘅物體，又親身體會到比老細卒數果種感覺．總括嚟講，生意人嘅節奏比起engine佬快好多，不過都唔係太大問題．

就响依個時候，我嘅新老細同我講佢今個月尾就要走．咁我咪變成孤兒仔？要解個天咁玩我？(定其實係我老細玩我呢？)

不過從好果方面諗，可能大老細會發現到我係一顆未經雕琢嘅寶石，委我於重任，等我可以坐直昇機上位都唔定．哈哈．

唔理得咁多，聽日就去峇里旅行，返嚟至算．

阿里爸爸

2007-11-07T10:10:00.000+08:00

阿里爸爸(1688)首日掛牌即升接近200%，以最高位$39.5計不連手續費，每手賺成萬三蚊，認真禾味．科技男以孖展入飛，分得兩手咁大把，不過因為膽小，一早已經喺$30放哂，足足賺少咗成餅嘢．不過知足常樂，當初都係以小博大，今次唔駛蝕錢都應該滿足．

本來上個禮拜，有報話個暗盤價係$26，仲要有成交噃．當時我心諗，升成倍咁恐怖，差不多成二佰倍pe，絛友係咪傻咗．事後證明，果位仁兄先係有料到．

咁究竟阿里爸爸值唔值$39.5呢？話哂成300倍pe，而且係07預期喎．睇返係Nasdaq上市嘅另一隻科網股Baidu，從Yahoo! Finance嘅資料發現，佢預期08pe都有成100倍．如果Alibaba 08年營利"照舊"按年上升三倍，都係100倍pe，咁睇爸爸又唔係特別貴．

睇吓百度嘅走勢，上市第一日升350%，連阿里爸爸都比下去．半年之後，雖然百度嘅營利上升咗4倍，不過股價就持續下跌至$45左右，超過50%跌幅，咁Alibaba又會唔會跟足？不過大家又唔好過份睇淡，因為今時今日，百度股價已經上升成十倍去到$400．所以如果看好阿里爸爸嘅業務，不妨等熱潮過後續步逐步吸納．

G.O.D與黑社會

2007-11-02T17:30:00.000+08:00

GOD因為出咗一系列以「拾肆K」為主題嘅產品，攪到警察要拉人．件事上哂頭條，睇怕今次慳返唔少廣告費．

有人會問，咁點解叫「勝興」肉枱，又或者「義安」公司又得呢？作為一個有腦嘅成年人，冇必要執著於依啲咁低B嘅問題．GOD明顯係踩線，攪gimmick，唔好再講啲乜嘢14K金嘅藉口喇．

究竟係依家啲年輕人庸俗咗，定係佢地好似啲法國青年咁對社會有怨氣呢？GOD為咗做生意要迎合大眾口味就無可厚非，不過背後嘅意義，值得我們深思．

My last day as a Design Engineer

2007-11-02T16:26:00.000+08:00

今日係我作為一個Design Engineer嘅最後一日，從下星期一開始(其實可能係今日收工前)，我再唔可以login Unix網絡，再唔可以寫我最喜歡嘅verilog，再唔可以用shell script．．．嗚嗚．．．

講真，要由靠對手搵食，轉到去用把口搵食，前路究竟係點我都睇唔通．不過我嘅信念係：「HKU出嚟嘅人得把口」，所以我都係「覺今是而昨非」，改邪歸正啫．

我自己就希望向business方面發展，無論marketing又好，sales都好，學多啲down to earth嘅嘢．至少當我40歲比人炒魷魚，出去攪生意都唔駛十下十下吖麻．

其實我仲有個好偉大嘅理想，就係要將香港嘅高科技行業攪起！作為工程師嘅我，深深咁體會到香港人對工程師嘅敲詐同輕視；人工又低過人，做嘅嘢又多，行頭又窄，真係想轉工都難．所以他日我修成正果，讀埋個MBA，學識一堆財技之後，必定喺香港大攪VC，整多幾間公司上市，以改善工程師嘅生活！

廣東燒味

2007-11-01T17:37:00.000+08:00

燒味依樣嘢，我諗大部份香港人都食過．雖然唔知係唔係香港人發明，不過香港的而且確通街都有燒臘檔．

係云云燒味當中，相信最受歡迎嘅應該係叉燒，因為你會食叉燒飯、叉雞飯、叉鵝飯等等，而好少會叫切雞飯又或者燒鵝飯咁寡．食叉燒，最好就係揀半肥瘦同尖端少少燶果部份，仲有面果層蜜汁都好重要嫁．灣仔有間叫"再興"嘅燒臘飯店，長期排長龍，啲叉燒真係冇得頂．

至於燒鵝，又或者應該叫燒鴨而真，就好難買到好食喇．有時啲燒鵝唔係太肥冇肉，就係乾爭爭，要脆皮嘅就更加難得．九龍城有間"裕記"好出名，不過科技男就未試過．

食燒味飯，有時好似抽獎咁，尤其係食雞同鵝嘅時候，因為師傅斬邊個部份比你好睇彩數．有人怕"鞋"唔食雞胸，又有嗜肉嘅人最憎食雞翼，當然人人都想食鵝脾啦，不過個dilemma係，你唔可以同師傅講你想食邊個部位喎．唔似得家鄉雞，起碼可以揀雞上脾或者雞胸．

我對燒味嘅要求好簡單，唔似有啲人又要新鮮雞又要食雞脾．對於我嚟講，最緊要係多肉大份，如果唔係，幾好食都冇用．

太興嘅八寶飯，食完飽到你死，不過我就覺得唔值喇．

秋風起

2007-10-31T17:41:00.000+08:00

今個星期開始轉涼，大家要小心身體．近幾日返工搭車好似少咗人，午飯時間又唔駛點排隊，可能好多人都病咗．

天氣凍凍地，最好就係食蛇羹．科技男都去過唔同地方食蛇羹，不過通常啲蛇羹唔係"稀"過頭就係得啲冬菇同木耳，完全唔掂．唯獨是屯門新墟有一間鋪頭，叫做蛇王輝，佢嘅蛇羹真係very good．個四眼佬啲蛇羹真材實料，啖啖肉，啲"卜卜趣"又唔會"淋"哂，檸檬葉又任落．你知啦，成三十幾蚊碗蛇羹，唔落多啲"卜卜趣"點回本呀．仲有，蛇王輝啲蠟味糯米飯好多人買嫁．

下面幅圖唔係蛇王輝嘅，不過送比大家望梅止渴啦．

Job Interview

2007-10-30T09:33:00.000+08:00

Link: 64 interview answers you need to know

I suppose most people have encountered at least half of the questions listed in the site. But even though we are experienced and well-prepared every time we have a job interview, we can easily screw it up by giving some ridiculous answers. (or just me on earth?)

As an unqualified interviewer myself, when I was then a tutor of a student dorm, I sometimes asked "nonsense" questions simply because interviewing a long list of candidates is a boring task. Basically everyone shortlisted is qualified. It's the "feeling" that separate the successful one(s) from the rest. So being yourself is truly important and don't try to play a part.

政治取向

2007-10-29T09:22:00.000+08:00

http://www.politicalcompass.org/index

做完個test, 發現自己原來係牆頭草.

每日一字

2007-10-24T21:36:00.000+08:00

Megaphone - 大聲公
Man up - 即係man啲
Horizontal challenging/Generously proportioned - 即係肥

廁紙

2007-10-23T16:01:00.000+08:00

我科技男貴為一家之主，購買日用品嘅責任當然落喺我身上．實不相瞞，我從小就有一種四圍格價嘅嗜好，無論百佳惠康定藥房嘅價錢我都料如指掌．

上個星期忽然間發現屋企廁紙快將耗盡，為免發生不幸事件，只好急急腳走落去樓下百佳入貴貨．平時慳家嘅我，多數都係買高級版Breeze或者維達，心情好就買下Kleenex．

就响我搵緊邊個牌子有10送2之際，突然發現咗有款Scott賣$21.9十二卷．心諗Scott都算係名牌，又話係咩加強版，雖然好明顯偷工減料，不過只係賣廿二蚊，除笨有精啦．

點知一開嚟用，"諧"到阿媽都唔認得．一濕水，就好似Tempo個廣告咁爛哂，真係大陸牌子都好過佢多多聲．以後買廁紙好係唔好貪平，對自己好啲，對屋企人好啲．

麵粉與麵包

2007-10-16T17:24:00.000+08:00

由信和、嘉華及南豐組成的財團，以57億元投得香港仔的一幅臨海地皮，尺價接近9千蚊．依個鐵三角，近排密密買地，繼科學園之後，又想响香港仔起豪宅．

睇下中原地圖，塊地對正深灣遊艇會，隔離有復康中心同安老院．行過少少，就去到黃竹坑邨，有巴士站又有街市，最啱菲傭買餸．前面又有一堆船廠，仲可以望住遊艇會，睇實自己隻遊艇．夜晚食飯都好方便，樓下就有船去珍寶海鮮坊，招呼親朋好友一流．山上面有兩間國際學校，送仔女返學只係需要十分鐘，唔怕佢地放學後週圍去．

齋睇地型，個格局有啲似一號銀海，咁會唔會又用返一號銀海高價買地以提高手上放盤嘅策略呢？不過香港仔好似冇新盤，睇嚟班有錢佬真係想起豪宅．如果將來可以賣到過萬銀一尺，最開心嘅應該係海怡半島同深灣軒班業主喇．

之不過，睇下信和係小西灣嘅藍灣半島，同樣打著港島臨海地段嘅口號．信和當年又係以天價投得地皮，結果係點大家都知．究竟係唔係「別人笑我太瘋癲，我笑他人看不穿」，真的要拭目以待．

文華Amber

2007-10-09T14:21:00.000+08:00

科技男生日當天，科技太為咗滿足我為食的慾望，帶咗我去食brunch buffet．上網搵過幾間酒店，州際要成幾個月前預定，其他Conrad、Ritz Carlton等又貴到死，咁啱上網睇到好多人都話Landmark Oriental嘅Amber好正，於是決定去試試．

Amber係有dress code嘅，男士如果著咗短褲，就只可以响side room食野．一坐低，侍應就比咗兩份menu我地；咦？乜唔係buffet咩？原來Amber提供嘅係semi-buffet，即係要先自定starter同main course，飲品同甜品就任食．

當時我個心一沈：「今次實食唔飽，唉．．．」雖然冇得勁食，不過難得嚟到高級餐廳，可以享受一下fine dining都唔錯啦．前菜叫咗tuna同yellow tail，主菜分別係羊同牛．味道真係冇得頂．個麵包籃我覺得普通咗啲，不過佢提供嘅黑醋就一定係上等貨．

其實冇得勁食都有好處，至少食物質素好啲，又唔駛同人迫．而且有任飲，可以勁飲紅白酒香檳咖啡果汁，淨係啲酒同杯cappucino都夠返本(好在科技太考咗車牌，哈哈)．Dessert buffet選擇都算ok，不過撞正做緊朱古力節，我又唔係朱古力怪，所以冇乜特別驚喜．

如果想享受一個舒服嘅星期日午餐，同女朋友或者三五知己吹下水，Amber嘅brunch係一個幾好嘅選擇．

註：為免被人發現我係大鄉里，所以冇影到相．走果陣時我架錢七就咁放咗喺酒店門口，施施然咁去咗H&M買完衫先攞車，生日真係大哂！

Free Burma!

2007-10-04T16:13:00.000+08:00

緬甸政府不斷地用武力去打壓手無寸鐵的人民，企圖平息人民對政府的不滿．要推翻緬甸軍政府，就好比當年六四，實在難過登天．不過，我們最少要停止一切血腥鎮壓，以及要求軍政府回應緬甸人民的訴求．

Link:www.free-burma.org

不要在下雨天賴床

2007-10-03T15:02:00.000+08:00

今日陰陰天，要一個人六點半鐘天未光就起身，是一種酷刑．

每朝都要七點一個字前出門口，趕七點三的村巴，如果唔係實遲到．唔知點解，今朝等咗成五分鐘電梯，落到樓下已經七點二．內心一路掙扎，究竟要不要以九秒九的速度追村巴？不過細密的雨點打敗了我，而且我腦海裡浮現了蛋牛治的影像，結果我去咗太興嘆早餐．

人算不如天算，阿姐話麵包未送到，唯有食其他早餐．可能落雨天打亂了送貨司機的陣腳，今日連AM730都未送到，所以買咗份蘋果，一邊睇報紙一邊飲奶茶，十足十退休阿伯咁．

食完早餐，就行去搭另一班八點鐘的村巴．平時依班車，返到科學園已經八點十，足足遲咗四個字．今日落雨，屯門公路例牌有人想死，所以村巴司機好醒目咁行上水個邊．點知都係避唔過塞車的命運．

最後返到公司，已經成九點二，重要同老細Sa冧．奉勸各位，千其唔好係落雨天唔願起身．

BBQ之賽後檢討

2007-10-02T16:57:00.000+08:00

國慶假期，大伙兒到了清水灣郊野公園燒烤．

雖然一行人加起來有幾百歲，不過BBQ的程度還停留在小學生階段：食物都是豬牛雞腸仔一類已經醃製好的肉類．觀乎其他一家大細的"燒烤客"，有蝦蟹帶子牛排羊排，這樣才叫做BBQ．

遇上一個極度慳家的科技男，分分鐘唔夠食．加上一個早有前科的肥仔，對食物數量掌握之差，真的無人能及．以後要準備BBQ食物，一定要選一個信得過的人．

其實買BBQ食物，不外乎幾個要點：
1. 腸仔肉丸買多好過買少．
2. 雞牛豬排預一人兩塊差不多．
3. 蔬菜類早好一早準備及用錫紙包好．
4. 炭是BBQ的靈魂，一定要揀乾身大條的．
5. 大量冰凍飲品．

不過，醉翁之意不在酒，一班人有講有笑，一齊放風箏，在大自然的環境中渡過了愉快的一天，才是重點．

Whom do we live for

2007-09-28T17:12:00.000+08:00

A touching Thai Life ads.

Link:youtube

一年容易又中秋

2007-09-25T11:40:00.000+08:00

今日八月十五，不幸地天公不肯造美，要賞月恐怕要加些少幻想力．

由細到大，我都好抗拒豆類食物，尤其是蓮蓉、紅豆沙等等．雖然如此，以前每逄中秋節我都會好期待食月餅，因此我最鍾意食鹹蛋黃．所以，每個月餅都會得個窿，餘下的部份就由阿媽包辦．

現在人長大了，依然不愛蓮蓉．為免膽固醇過高，連鹹蛋黃也一拚放棄．同事們興高采烈地分享著送來的月餅，我只有替他們開心．

以前會在走廊公園煲蠟，又或者將溶了的蠟倒入汽車蓋裡做蠟燭．現在，街上連小朋友玩燈籠亦很少見到，換來的是NDS或PSP．是科技改善了人的生活，還是令人的生活變得缺乏個性？

昂山素姬

2007-09-24T10:36:00.000+08:00

一個女人，斷斷續續地被軟禁了接觸二十年．在家庭與人民之間，她選舉了後者，結果連自己丈夫的最後一面也未能看見．我想這個人的情操，是那麼的令人肅然起敬，令人感覺到她是一位偉大的英雄．

但願今次憎人上街，可以將漣漪變成更大的波浪，令緬甸人民得到自由．

過去已經有很多明星出來呼籲釋放昂山素姬．Jim Carrey收起攪笑形象，格外叫人深思．

Source:
Nobel Prize press release
Wikipedia

環保衛生巾

2007-09-24T10:10:00.000+08:00

雖然全球暖化，北極溶冰，空氣污染，熱帶雨林消失，全人類都講環保，但係「環保衛生巾」是否有點過火？

果塊「環保巾」，好似尿片咁厚，同電視廣告成日標榜嘅「超薄」有好大距離．如果一日要換幾次，究竟响街洗好，定係袋住留返屋企先洗呢？

果位陳女士話，可能有部份女士會不太接受該產品．計我話，九成九嘅人都唔會接受到．

Source: 環保衛生巾循環再用

認錯

2007-09-19T16:51:00.000+08:00

我知錯喇．科技男只係一個星斗市民，唔應該亦都冇資格同啲大行經濟師賭：估唔到美國真係減息！

伯南克一係唔減，一減就半厘，深深咁令我覺得條友真係冇骨氣．小小嘅壓力都承受唔到，為求教啲炒燶咗樓嘅美國人，明明通漲威脅存在，仍然減息救市．其實，我應該記得伯南克一上任時講過：「有需要我時會揸直昇機掟錢落街！」全世界一聽到美國減息，股市即刻爆升，今日香港都升成千點，比起其他地區更癲．

今次減息，表明聯儲局重視經濟前境多過通漲，睇嚟資金過剩嘅情況將會持續，資產泡沫亦會繼續吹大．咁嘅情況之下，最好就係買資源／金屬股、地產股、高息貨幣(英磅除外)同黃金．經濟軟著陸未能出現，下次降落嘅時候，小心趺死．不過富貴險中求，唔買就笨喇．

禽流感

2007-09-18T10:49:00.000+08:00

番禺鴨場爆發H5N1禽流感，攪到依定香港冇鴨、鵝供應，唔知依家仲有冇得食义鵝飯？遲下會唔會連雞都冇得食？

查實响成年之前，世衛已經講咗今年係禽流感高峰期，不過個股市炒到慶烚烚，冇人會記得啲負面新聞．

所謂屋漏偏逢連夜雨，大陸有禽流感，歐美又有次按問題，雖然有北水南調概念，不過後市都唔好太樂觀．美國聯儲局今後議息，萬一唔減息，聽日唔知死幾多人，就算減1/4厘，市場都可以話減得少，照樣沽貨獲利．一於買張恆指put輪，同佢賭大細．

英國、美國受房貸市場影響，下半年經濟勢必放緩．加上日本經濟前景不明朗，唯有以中國及一些新興市場支持全球經濟．究竟中國頂唔頂得到奧運，就要視乎個雪球會唔會越滾越大．

粗口

2007-09-14T14:19:00.000+08:00

香港地，又幾多人未講過粗口．無論中文的「門小」，抑或英文的F-word，一生人總起碼講過一次吧．

究竟電影中出現粗口對白，應不應該被列作三級片？且看看全球最大的電影出產地－Hollywood－如何將電影評級．

原來在美國．所有電影皆是自願地送到美國電影協會(MPAA)作評級，而評級的準則，是「根據凡父母的角度去決定電影是否適合子女觀看」．MPAA的評級分為以下五級：

1. G - General audiencs
2. PG - Parental guidance suggested
3. PG-13 - Parents strongly cautioned
4. R - Restricted
5. NC-17 - No one 17 or under admitted

值得一提的是，原本第五級稱為X-rated，不過由於被色情電影商濫用(就是XXX囉！)，所以被NC-17取代了．

MPAA對電影作評級，並沒有一個固定的規則，而是根據主題、語言、暴力、裸露、性、毒品等等多方面考慮．而根據Wikipedia中的資料所講，電影中出現Fuck這個字，最多只會被評為PG-13的級別，即不適合13歲以下小童觀看．沒有真憑實據，信不信由你．

現在一套《出埃及記》被評定為IIB級，就好像皇恩浩蕩，要多謝影視處似的．又有人覺得放寬管制，會對小朋友有不良影響．究竟，有幾多家長，會帶仔女入場觀看《出埃及記》？恐怕未到講粗口一幕，小朋友已經嚷著要離場．

Link:
蘋果：影視處開綠燈
MPAA @ Wikipedia

New Mazda 6

2007-09-13T14:09:00.001+08:00

傳聞已久的全新Mazda 6終於在法蘭克福車展中亮相．一直以來M6的定位在於挑戰Toyota Camry及Honda Accord．不過新一代的M6，賣相比以前更加討好，華麗的感覺直迫Lexus的IS250．

打從推出Zoom-Zoom計劃以來，以及和Ford合併以後，Mazda無論在設計抑或造工方面，都有著明顯的改善，為中型房車市場帶來了沖擊，亦吸引了一班年輕的買家．

歐洲的設計，和用上Ford Focus有名的扎實底盤，確實為M6增加不少分數．如果Mazda能夠開發出更好的傳動系統，以及加強車箱設備，必定能夠為Mazda帶來更多的買家．

紅色炸彈

2007-09-12T13:41:00.000+08:00

今日收到一封由同事發出的紅色炸彈，又要破財！

雖說身邊朋友同事，到了這樣的年紀，結婚生仔在所難免．不過自己結婚之後，如果收到闔府統請的喜帖，荷包就會得到雙倍的重創．

有時我會認真地想，究竟現在的「公價」，是否仍然是$500/$300，抑或隨著豬肉牛肉石油價格上漲，「公價」已經往上修訂呢？如果並非經常有飲宴，萬一和市價脫節，到時出醜事小，得罪人事大．

有沒有人可以告訴我，現在「公價」究竟幾多？

Boredom (or Feeling Too Busy)

2007-09-11T08:53:00.000+08:00

This article is really my life-saver, and should be a good one to those lazy-bones or workaholics.

10 Ways to Conquer Boredom (and Feeling Too Busy)

幽默感

2007-09-10T09:27:00.000+08:00

香港人生活忙碌, 每天為口奔馳, 好缺乏幽默感. 為何屯門河或者城門河不能有這種無聊的比賽?

鴨仔慈善泳賽

笑話

2007-09-10T09:23:00.000+08:00

無論你喜唔喜歡數學, 或者數口精唔精, 好應該會覺得好笑.

Everybody loves a Math joke

What's in you head?

2007-09-07T14:41:00.001+08:00

Try:

http://usokomaker.com/

Engrish

2007-09-07T10:33:00.000+08:00

Wanna learn better English (or to avoid a bad one)? Visit this site. There is a Chingrish session too.

http://www.engrish.com/faq.php

蘋果發功

2007-09-06T17:07:00.000+08:00

蘋果一次過發佈咗幾款新iPod，氣勢強勁．不過科技男一向唔係iPod粉絲，因為iPod出嚟啲聲好鬼差(有人話原音喎)．即管睇吓新iPod係點：

1. iPod nano
比上一代nano肥，全因為要加入兩吋螢幕用嚟睇片．個人覺得吸引力唔大．

2. iPod classic
同以往嘅iPod一樣size，不過容量加大到160Gb，以及電量加長到可聽歌40小時．用開iPod嘅可能會考慮升級．用嚟做photo bank或者流動hard drive都幾好．

3. iPod touch
真正嘅重頭戲，同之前嘅傳聞一樣，係一部”閹割版”iPhone；大螢幕，有wifi，可以睇youtube．明顯係為咗iTune賣movie而推出．８Gb版本只係賣US$299，應該好多人會爭住買．

仲有嘅新消息，就係iPhone會由US$599勁減至US$399．科技男一向唔太睇好iPhone，唔係話iPhone唔賺錢，只係覺得冇想像中咁好賣．因為流動電話市場比一般consumer產品複雜，牽涉到網絡服務供應商．蘋果今次減價，會唔會就係因為去貨唔夠快呢？

天才

2007-09-05T16:05:00.001+08:00

曾幾何時，科技男以為自己係一個天才兒童．

我覺得無論小學定中學，讀嘅嘢都好淺，唔明白點解老師要花咁多時間教書．所以上堂唔係瞓覺，就係聊人傾計，於是乎每年份成績表，都會得到"talkative"依個comment．不過上到大學，先知道自己細個冇比心機讀書，攪到根基唔好，而且發現咗原來自己都幾蠢．

我係網上面做過啲IQ測驗，最高試過有140幾分，仲以為自己真係天才．後來先發現原來求其做都過百分，又做咗傻仔．

今日報紙講九歲就入大學嘅沈詩鈞，話第一日嘅課堂太淺．香港啲大學嘅數學系，好話唔好聽一直都係啲所謂水泡科，即係報JUPAS時為咗買個保險先揀嘅科目，所以收生嘅成績一向都唔高．啲"成績普通"嘅大哥哥大姐姐都識嘅嘢，對一個天才嚟講係悶啲嫁喇．

不過正所謂童言無忌，沈小朋友講句咁嘢，可能會令好多"同學仔"自卑兼唔開心都未定．睇嚟浸大除咗要放心機落去依位神童之餘，都要多加輔導吓其他學生，免得佢地鑽牛角尖．

明報：浸大第一課神童嫌「好淺」

天陰陰

2007-09-04T08:25:00.000+08:00

最好就係聽吓歌．

Damien Rice - Blower's Daughter

張學友－分手總要在雨天

余若薇

2007-09-04T08:11:00.000+08:00

迎幾年多咗啲律師之類嘅專業人士去從政．當中有一位我覺得最討好嘅，就係余若薇．佢嗰種女強人得嚟又有啲小女人嘅形象，响香港依個無聊嘅政治舞台，尤如一股清泉．

好不幸地，睇報紙知道佢個腦生咗個瘤．不過奇就奇佢，點解蘋果同東方講嘅嘢可以差咁遠？

蘋果：余若薇從容面對腦血管瘤

東方：余若薇生命倒數

科技園對澳門發出挑戰書

2007-08-31T16:03:00.000+08:00

繼早前提到的海濱長廊之後，為吸引市民到沙田及大埔區消遣，科技園公司將推出另一傑作－－拉斯維加斯Ballagio式的音樂噴泉，以及媲美日本Tokyo Dome的金色巨蛋！

據了解，噴泉及巨蛋一直被有關方面視為抗衡澳門威尼斯人及美高梅賭場的重點項目，並希望能夠在年底前落成．而科技園第三期的發展亦正進行得如火如荼，雖然當局未有透露詳情，不過不排除當中會有高爾夫球場、立體電影院、大型購物中心，以及傳聞名為「科8」的豪宅項目等等．

下次踩單車遊吐露港，不妨停低於科技園逛逛．

做運動

2007-08-29T21:44:00.000+08:00

小學的時候，最愛踼足球，可以同的士佬踼一個下晝．

中學的時候，最愛打籃球，可以和朋友由朝頭早十點打到夜晚十點．

大學的時候，愛上了跑步．由初初被迫練跑，到參加半馬拉松，跑步令我得到一種滿足感．每次跑步時想著的，是一定要跑完全程，或者要比上一次跑得更快，要挑戰的並非別人而是自己．

科技太話跑步太悶，唔啱佢．不過我跑步嘅時候，基本上唔係好諗到嘢，所以都冇話悶唔悶．

如果大家想跑步，最緊要係一對好嘅跑鞋，用以保護雙腳．我新買咗對Mizuno，感覺上好過New Balance好多，不妨一試．

View Larger Map

剪頭髮

2007-08-27T17:34:00.000+08:00

我剪頭髮嘅時候，最怕幾樣嘢：

1. 啲人不停咁同我講嘢．
2. 洗頭時將啲水彈哂落我塊面度．
3. 用護髮素幫我個頭按摩．

最衰就係男人啲頭髮好快長，頂多一個月就要剪一次，每次去剪頭髮都好似去送死咁，真攞命．比$500剪一次果啲服務係好好多，起碼洗頭唔會洗到好似玩激流旅程．不過太貴喇，一個月一次，一年未成$6000蚊?

星期又六又去剪頭髮，個洗頭姐姐係咁問我叫乜名，做邊行咁．起初我以為我魅力過人，連姐姐仔都吸引到．後來我先意識到，可能佢見我係生客，先幫個髮型師問下我啲料，等陣個髮型師可以同我吹兩咀，打下關係．見微知著，依間髮型屋嘅管理的確唔錯，唔怪得可以開成四間分店啦．

又係Starbucks

2007-08-27T17:27:00.000+08:00

今日收到email，3:30 Starbucks有免費咖啡任飲，於是同咗四個同事落去排隊(冇錯，啲人唔再怕死喇，免費嘅威力真係大)．點知條人龍仲長過平時放工等車嗰陣時，足足等在成半個鐘先有得飲．冇計，唔駛錢係咁上下．

破產2

2007-08-24T08:24:00.000+08:00

日日一Starbucks，銀紙遠離我．

TGIF，一杯grande latte + blueburry scone，令人心情愉快．

仲有一張買一送一劵，下個星期一，唔駛再絕望．

破產

2007-08-23T15:55:00.000+08:00

科技男期待己久的Starbucks終於開張喇！依家幫襯仲有買一送一優惠，好開心．不過有喜亦有悲，睇怕我想唔破產都幾難，哈哈．

話時話，點解有啲人連落樓下買杯咖啡都怕死，好似被人發現就會即刻炒魷魚咁！？一杯Starbucks就可以耀武揚威，簡直雙重興奮！

發達

2007-08-20T22:07:00.000+08:00

上個星期，全個世界都講緊次按危機，股市下跌不特止，連基金都要停止贖回，十足十世界末日．

點知到咗星期五，Uncle Sam終於出手，調低聯邦基金貼現率，以增加市場資金流動性．今日到阿爺幫拖，放寬國內同胞個一QDII，令恆指由上星期五最低位到今日收市，升咗成二千點有多，兩日就收復失地．

次按風暴加埋信貸危機，極其量只係短期心理問題，經濟會否被影響，尚有待第四季的數據．不過資金仍然氾濫，尤以中國及石油輸出國為甚，是不爭的事實．只要一日個天未跌落嚟，似乎一日都重有得炒．要發達，就要好好把握喇．

跳樓機？過山車至真

2007-08-17T14:38:00.000+08:00

繼昨日跌近600點後，今日恆指再曾經跌超過1200點，收市只跌2佰幾點，刺激過坐過山車．由最高位23558點起，累計跌幅不過1４%．咁又算唔算股災呢？查實以前啲股災，閑閑地跌四五十個巴仙．依幾年香港人習慣股市有升冇跌，面對市況逆轉，係會怕死啲．

之但係睇返國企指數，由最高位13593，跌到依家11000邊，差不多有兩成跌幅．究竟有幾多人$30以上入中人壽，或者$65以上入平保之類，依家就成手蟹貨．高位買左國企，都叫有得守吓，頂龍好似中移動咁，十年見家鄉．如果揸住啲三四線又冇止蝕，就真係一殼眼淚．

恆指穿咗250天平均線，係咪等於牛市玩完？其實依個跌浪，始終次按問題，引發信貸收緊及信心危機，好多地區經濟基本上依然強勁．雖然幾乎可以肯定美國下半年一定冇運行，全球經濟唔多唔少都會受到影響，不過又未至於要太過悲觀．Mood always swing between optimism and pessimism．只要掌握到市場情緒的轉變，下一個升浪可能令人發達都未定．

通脹與核心通脹

2007-08-14T22:04:00.000+08:00

國家統計部公佈最新7月份的數據，顯示CPI已經上升至5.6%．對於通脹高企，有專家認為，物價水平上升主要由食品價格上漲所致，核心通脹只有0.9%，因此認為現時並未有嚴重的通脹危機．

一般而言，各國中央銀行皆以扣除了能源及食品價格的核心通脹作為制定利率的指標或參考．因為在一般情況下，能源及食品價格比較受季節的影響．好像冬天的時候，能源的消耗量會比較高而令油價上升．又或者遇著天災，蔬菜等價格會上漲一樣．

然而，當能源及食品價格上升是長期趨勢而非週期性的波動，核心通脹指標又會否仍然是物價的探熱針呢？在一些發展中國家，例如中國，食品價格可以佔 CPI七成以上，如果說食品價格上漲並不會對經濟構成威脅，那未太過免痴人說夢話．而且民以食為天，國內人民得不到溫飽，對政府方面可能產生動盪，這絕對不是中央政府願意見到的．再者，國內有燃油、電力價格管制，國際油價上升，CPI又能夠反映幾多？對於通脹，大陸似乎束手無策．提高不了供應，就索性限價，掩耳盜鈴．

通脹失控，後果足以令經濟衰退．某程度上，物價上升源於投資過剩，例如農地變工地，原材料價格上升等等．縮緊銀根，令固定投資減少，似乎事在必行．莫非要阿爺真的發火，大家才知驚？

打風

2007-08-10T20:31:00.000+08:00

硬係覺得，細個嘅時候多啲機會打風．

以前打風，第一件事就係約人睇戲，再唔係就成班人去唱K．暑假嘅時候，通常都會同朋友仔去大嶼山宿營．撞啱打風嘅話，就會圍埋一堆講鬼故．橫風橫雨，樹影婆娑，膽少啲都嚇死．

打風對一個打工仔嚟講，就好似中六合彩頭獎咁令人興奮．之不過返工返得遠嘅，一話收工嘅時候，都唔知走唔走好．事關望見巴士站地鐵站嗰成千上萬嘅人，與其係街度食西北風，不如留响office做多陣嘢好過．

話時話，原來香港已經三年未掛過八號風球．

求婚大作戰

2007-08-08T16:24:00.000+08:00

老死肥龍噚日求婚成功，真係可喜可賀．作為兄弟嘅我，會盡我所能，幫佢避開所有燒肉、薯片、汽水、自助餐、韓國燒烤等等嘅美食，務求令到佢”回復”到190磅嘅健美身型．

每一個男人都有不同嘅求婚方式．有人可以誇張到好似拍戲咁，又有人可以好似閑話家常咁輕輕帶過就算．不過就算拍拖十年，到開口嗰一刻，都可以好似第一次傾計時一樣咁緊張．

喺精心安排嘅佈局之下，唔知個個女仔嘅反應係咪都一樣嘅呢？先係不知所措，來不及比反應．之後兩個人拉扯一輪，但求男朋友快啲起身，盡快離開現場以避開路人的目光．最後無可奈何，只好答應要求，戴上戒指，將下半生拱手讓人．

其實如果拍拖有返咁上下日子，對結婚生仔都應該有一定嘅共識，開得口求婚又冇乜理由會拒絕．不過一次浪漫嘅求婚，可以令日後有個美好嘅回憶，分分鐘喚起初戀嘅感覺都唔定．

2007 new iMac

2007-08-08T14:46:00.000+08:00

Sexy, elegant, stylish. The new iMac looks like the perfect replacement of my PC desktop, even though the new OS X Leopard is missing. It's time to think about migration plan.

國際金融中心

2007-08-06T17:21:00.000+08:00

今日星島日報有篇報導，指有國企不滿港交所上市規則多多，令大型國企來港上市的數量大為減少，進而威脅到香港作為國際金融中心的地位云云．

國企財大氣粗，而且國內公司的管治有很多方面尚未能達到國際水平，用言語對港交所施壓實在不足為奇．需知道作為一個國際金融中心，除了市值、交投量等因素之外，最重要的是一套完整的法規，以保障投資者及市場參與者的利益．要吸引海外公司來港上市，港交所大可提供協助，或者加快審批程序，但絕對不能在尺度上有任何妥協．

且看港交所會甚樣回應一班大腕吧．

Link: 港上市要求多國企不滿

大插水

2007-08-01T22:02:00.000+08:00

今日恆指收市跌730點, 即月期指更加試過跌成千點, 國企指數又大跌4個幾巴仙. 外圍唔好得幾多, 連一向食咗偉哥嘅A股都要跌, 相信好多人要食驚風散. 查實yen由123美元短短幾日直上到118美元, 攪到上個星期五美股借勢調整, 但係星期一港股非但唔跟, 仲要升成四佰幾點. 依幾日啲yen升勢凌厲, 全世界都要回調, 港股最終j都係要"追落後".

跌咗咁多, 後市又點睇? 次級按揭唔係今日先有嘅事, 只係啲人後知後覺, 攞嚟做炒作藉口. 日元勁升, 引發利差交易平倉, 不過日本經濟前景有待觀察, 加上日本政局"立立亂", 斷估冇人會夠膽响依個時候加息, yen遲早都要回返落去. 雖然全球信貸開始收緊, 不過資金仍然泛濫, 所以唔駛睇得太淡住.

本來掛咗牌想喺$31.5買中人壽, 不過買唔到. 今日收市期指低水150點, 即管睇吓聽日下晝升唔升得返.

踏單車撞牆死

2007-07-30T16:17:00.000+08:00

雖然咁樣講好mean, 不過究竟點可以踩單車撞牆死呢? 係咪真係生死有命, 富貴由天呢?

==================================================
男子彩虹隧道踏單車撞牆死 (本地)
2007年7月30日 HKT: 上午 08:04:00

一名男子清晨在彩虹鸷行人隧道踏單車，失事撞牆死亡。

現場是一條由太子道東通往麗晶花園的行人隧道。清晨5時，一對男女在紫薇樓對開一條行人隧道踏單車，43歲男事主轉彎時失控撞牆，送院後證實不治。

由皇帝到藝術家

2007-07-26T16:54:00.000+08:00

「九龍皇帝」曾灶財駕崩，享年八十六歲．多份報紙均以頭條報導，可見依位無冕皇帝對港人之影響力．

作為一個新界仔嘅我，並冇太多機會親眼欣賞佢嘅真蹟．最多人認識嘅，當然係尖沙咀天星碼頭嘅大作啦．

原來皇上佢嘅作品，曾經响蘇富比以５．５萬蚊賣出，剩係依樣嘢，好多藝術家恨都恨唔到．鄧達智，GOD等等都以佢手字為題材，身邊又有人欣賞佢，雖然皇帝一生兩袖清風，不過老年亦似乎得到了一些安慰．

好多人都話曾灶財係一個藝術家，我對依個睇法有少少保留；話佢代表咗一種文化、一個時代，我就絕對認同．無論佢係咪傻都好，佢嘅字跡同佢响街周圍寫字嘅行為，已經成為咗好多香港人、甚至外國人嘅回憶．

希望佢响另一個國度，搵到一個真正屬於自己嘅領土啦．

賣旗

2007-07-25T09:35:00.000+08:00

平日碰到賣旗，我都習慣先看看受惠的組織，畢竟騙財的所謂慈善團體實在太多．

睇《案內人隨筆》，先知道今日明光社賣旗，而且網上亦發起了罷買行動．明光社的所作所為，大家都應該略知一二．科技男雖不至於和明光社有深仇大恨，但亦覺得捐錢比奧比斯來得更有意義．

http://www.gopetition.com/petitions/blind-rescue-operations.html

小勝一局

2007-07-25T09:20:00.000+08:00

終於可以鬆一口氣．log in的時候，心跳加速，手震腳震．四個月的努力沒有白費．

Level 2，明年六月再見！

喪升

2007-07-23T22:06:00.000+08:00

匯豐隻翔龍基金(820), 上個星期一上市已經升左成兩成有多. 今日收市又升41%, 隻基金到依家仲未開始買貨, 即係手揸嘅全部係cash, 比起NAV有成76%溢價. 依種ETF個價係咪一定等於NAV? 非也. 理論上, ETF個價應該大約相等於NAV, 否則便造成套戥的機會. 不過短期的價格波動仍取決於供求定律; 受追捧的時候, 基金的價格可以比NAV出現溢價, 相反, 當被市場拋售的時候, 價格亦可能比起NAV大幅折讓.

依家長聾基金個溢價, 代表著投資者期望於短期內獲得超過七成的回報. 過去一年, 甚至半年, AH股的升幅驚人, 這又是否代表著走勢會長期持續呢? 理智的人會錯過今次瘋狂派對, 聰明的人懂得火人取栗, 普通人會以為自己比別人高明. 最後結果如何, 一日未埋單, 一日都未分勝負.

Starbucks@科學園

2007-07-20T14:39:00.000+08:00

我一直認為科學園欠缺了一間咖啡店:只要是一個小小的攤檔，朝八晚五，兼賣鬆餅、三文治、芝士餅等早餐小食，於願足矣．早前雖然進駐了一間小店，曾經令我有過一絲憧憬．不過其出品之差，令大家樂的咖啡亦味如甘露．

今天早上突然發現，平日經常走過的大堂，多了幾塊圍板－－Starbucks將要登陸科學園！以後就不用埋怨新城市廣場的Starbucks太遲開門了．

====================================================================
題外話：

廣場上之天幕已經完工，在此入午睡的不再是地盤工友，而是一眾工程人員．

全球第一高馬

2007-07-20T08:38:00.000+08:00

蘋果日報:
住在美國田納西州的馬兒「蒂娜」（ Tina ）今年 3 歲，還會長高，但牠的肩隆（兩肩骨間隆起處）已達 2.05 米，正申請列入全球最高的世界紀錄。美聯社

隻馬咁巨型，令我諗起北斗之拳入面拉奧所騎嘅巨馬「黑王」．

假日郊遊好去處

2007-07-18T15:11:00.000+08:00

科技男每朝晨咁早就要去科學園返工．科學園位於沙田同大埔中間嘅馬料水，一個平日人煙罕至嘅“山卡啦”地方．响依度返工，最慘係冇啖好食．比較正常嘅係一間叫《喜慶》嘅酒樓，佢嘅流沙奶皇飽真係掂，奶黃嘅甜味同蛋黃嘅鹹味平衡得好好，餡汁熱辣辣，唔會乾爭爭咁．依間酒樓係西鐵元朗站有分店，得閒可以試吓．

近幾日，整咗成年嘅海濱走廊終於完工．以前細路仔嘅時候，由沙田踩單車去大埔，吐露港旁邊只係一個大海，沿途有乜地方可以休息，大熱天時都幾攞命．而家嘅吐露港單車徑，有涼亭又有公園，爭在未有雪糕車同魚蛋檔，以後一家大細又多個地方去玩喇．

為咗唔好比自己個肚腩不斷壯大，好多時食完飯，我都會去海邊行吓，順便曬吓太陽，吸收維他命D．海濱走廊開放之後，我就唔駛再圍住個地盤食塵．尤其是依幾日陽光普照，响海邊食吓風，睇吓啲熱到死都重要踩單車嘅年青男女，個人都開心啲．

今日重有個開心大發現，就係之前封住咗嘅望遠鏡終於有得玩喇！個望遠鏡係Nikon做，一睇就知係好嘢．一望之下，發現連船灣淡水湖開面有人玩風帆都睇到，風水地比華利山啲屋又睇到，連對面馬鞍山啲人換衫都睇到．唔知馬鞍山啲居民知道後，會唔會抗議呢？

怕事

2007-07-17T18:11:00.000+08:00

睇到渣老闆話佢响戲院大大聲咁叫人唔好講電話, 依種咁英勇嘅行為簡直令我肅然起敬.

雖然依家啲戲院, 都會係開場前個trailer叫大家熄電話, 但係我諗九成九嘅人都遇過隔離左右有人講電話, ,又或者後面有條友講哂成套戲嘅劇情出嚟. 絕大部份嘅時候, 都冇人夠膽開口叫人收聲.

查實科技男都有試過一次發炮嘅經驗. 果陣時响金鐘UA戲院睇戲, 有個鬼佬好大聲咁講電話. 你知金鐘間UA好多西人去睇戲, 我當時心諗, 鬼佬應該冇中國人咁怕事, 點解冇人叫佢收聲呢? 我盤算咗好耐, 响腦海中不斷咁練習英文嘅正確發音. 就喺能量bar變咗紅色, 頂唔順要爆嘅時候, 我擰轉頭, 好大聲咁講咗句: Shut up!

果一刻, 就好似渣老闆所講, 腎上腺素急升, 心跳加速, 著哂火咁. 不過, 唔知係咪我英文差, 又或者我其實太細聲, 個鬼佬似乎冇乜反應. 就係咁, 我興奮嘅情緒急速退卻,成個人謝哂皮, 乖乖地坐低繼續睇戲.

又有一次, 我响西隧口等緊巴士. 當時正值放工時間, 有幾個人排喺我前面, 條隊都有返咁上下長. 忽然間有個地盤佬, 施施然走咗去隧頭”排隊”. 大佬, 依個鐘數, 加上咁耐都未有車, 如果比人打一打尖, 分分鐘上唔到車嫁. 奇怪嘅係, 冇人敢出聲, 大家都怕咗地盤佬.

正當我有氣難消嘅時候, 巴士已經悄悄地埋咗站, 而地盤佬亦開步想上車. 果幾秒間, 我唔知自己short咗邊條線, 竟然用盡我所有氣力, 好似打美式足球咁撞開個地盤佬, 然後自己就走咗上車! 個地盤佬稍為定一定神就大叫: 你癲咗呀! 雖然當時我仲驚魂未定, 不過亦回應咗句: 搭車要排隊, 唔好打尖!

個地盤佬條氣唔順, 重响到係咁鬧, 不過好彩有個熱心嘅阿姐, 見我文弱書生一個, 就頂上幫我同地盤佬展開罵戰. 到最後, 地盤佬梗係鬥唔過阿姐啦.

的士罷駛

2007-07-16T18:16:00.000+08:00

今個週末, 如果你從外地坐飛機返香港就真係唔好彩喇, 因為的士罷駛, 攪到啲人要由機場行出東涌搭車呀, 陰公.

的士罷駛, 原因係機管局突然將電召的士同客貨車上落客區, 搬到無雷公咁遠. 如果你有試過响機場call的士, 都會知道個新上落客區係幾咁遠, 亦可能明白點解啲的士司機咁火滾. 其實啲所謂電召的士, 九成九都係有折的士. 你諗吓, 機場咁死遠, 唔係有七折八折的, 打死我都唔會坐的士去機場. 機管局咁樣做, 擺明係想打擊的有折的士同客貨車.

有人會話, 八折的有法不依, 理應打壓. 不過如果話你知, 明明屋企個香港寬頻可以$128無限上網, 而政府卻限住要收$198一個月; 又或者和記同你講3G可以$38無限分鐘, 但係電訊管理局話唔得, 迫佢收$98, 咁又有冇問題呢?

既然有的士司機比八折, 甚至七折六折, 即係話的士有減價空間啦, 唔通人地會做蝕本生意咩. 咁究竟有邊個會反對的士減價呢? 當然係個班揸住個幾佰萬的士牌嘅人啦. 事關的士一減價, 個的士牌即刻貶值, 身家縮水, 重分分鐘負資產嫁. 而政府為咗保障有比專利費嘅巴士同鐵路, 亦都唔想的士減價. 就係因為市場被扭曲, 先至有八折的依種畸形產物出現.

下次坐長途的士, 不妨call架八折的, 為爭取小市民嘅利益出一分力.

香港人, 唉……

2007-07-16T16:26:00.000+08:00

星期日, 鬼死咁熱, 留响屋企開住冷氣睇電視. 噤噤吓個remote, 發現有線1台有得睇歐亞桌球大師賽. 我雖然唔係一個桌球迷, 不過由細到大都好鍾意玩桌球game, 於是乎就眼定定咁望住部電影睇比賽.

打到去一局, 係奧蘇利雲對馮國威. 話說奧蘇利雲係當今桌球界中數一數二, 連我依個門外漢亦聽過其大名, 至於馮國威有幾勁我就唔知喇. 本來大師獻技, 觀眾表現興奮亦無可厚非, 而奧蘇利雲技術之高超, 亦令我睇到目瞪口呆. 之不過點解當馮國威打失波嘅時候, 現場觀眾要報以噓聲呢? 同一場合, 好似賀歲杯對外國明星球隊嘅時候, 啲球迷一樣咁鍾意噓香港隊. 就算強弱幾咁懸殊都好, 香港人點解唔可以支持吓自己人呢?

果個主持重好笑, 打完場波, 問馮國威:「奧蘇利雲咁勁, 你有冇向佢偷師? 」大佬, 人地都係職業桌球手, 唔通要人答你:「我咁渣, 梗係要啦」咩. 睇見馮國威目無表情個樣, 如果我係佢, 真係會打個主持一鑊.

香港人呢, 個個都好有世界觀. 講足球, 有人支持英格蘭, 有人支持意大利, 但係好少人會支持中國隊香港隊, 講籃球, 就梗係NBA啦. 無錯, 香港係好多運動項目都好屎, 叫人唔好支持外國隊伍, 不如叫人唔好支持運動好過喇, 之不過話晒自己友, 唔做fans唔緊要, 比少少鼓勵, 唔駛死嫁.

Wii@E3

2007-07-12T14:33:00.000+08:00

一年一度的遊戲界盛事E3剛剛揭幕, 任天堂就公佈了幾款為Wii而開發的新產品:

1. Wii Zapper - 就是將Wii控制器變成手槍的一個配件, 專用於射擊遊戲. 之前已經有副廠推出過類似產品, 原廠設計的還是第一次.

2. Wii Balance Board - 有兩個感應器的平衡版. 連同Wii Fit遊戲, 可進行一系列健體遊戲, 例如健康舞掌上壓, 瑜珈等.

3. Wii Wheel + Mario Kart for Wii - 熱爆全城的NDS瑪利奧賽車終於登陸Wii, 還附上一個塑膠呔盤, Wii迷就不用再下載N64版本喇.

source: engadget

朱培慶事件之教訓

2007-07-11T19:56:00.000+08:00

朱處長避咗幾日風頭, 終於攪到要提早退休. 好左啱啱夠年齡退休, 如果唔係, 分分鐘連份長糧都冇埋.

朱處長落得如此下場, 歸根究底都係佢危機意識太低. 加上人到中年, 又就快退休, 就攪出個臨老入花槽嘅大頭佛. 港台下場會點, 我冇乜興趣, 倒不如睇吓依件事比到啲乜嘢教訓我地啦.

1. 偷食行遠啲. 千其唔好去啲人多嘅地方搵食.
2. 比人撞破好事, 要處變不驚, 如果唔係水洗都唔清.
3. 逃避係唔可以解決問題. 應該先發制人, 話人地侵犯私隱.
4. 要玩就玩好啲. 成萬銀先玩到個自稱廿歲嘅Coco, 冇面.

其實件事入面, 最慘果個唔係港台員工, 唔係Coco, 又唔係朱培慶自己, 而係Must Kara嘅老闆. 試問件事上哂頭版, 個竇揚哂, 重邊有達官貴人敢去玩, 聰執都似. 可憐.

朱培慶與香港電台

2007-07-09T14:04:00.000+08:00

近幾日報紙不停講朱處長與豔女Coco之事, 睇見佢真係好可憐. 幾十歲男人出嚟應酬又好, 搞搞震又好, 比人見到就左閃右避, 真係老猫燒鬚. 我諗只有兩個可能性: 第一, 朱處長已經啤啤夫, 神智不清. 第二, 佢係一隻純情小羔羊, 好少出去蒲.

姑勿論處長有冇同Coco搞埋一堆, 極其量佢只係需要同佢老婆仔女交代. 香港電台果班人, 夠膽死話人地講乜嘢大話, 仲影響埋士氣添, 吹脹! 老闆去滾, 有點樣影響員工士氣呢? 港台啲人, 扮晒衛道之士, 無非想乘機整走處長嗻. 事關處長係港台阿頭, 迎排政府又吹風想私有化港台. 一私有化, 隨時減薪加裁員. 只要阿頭一走, 私有化件事就可以拖字闕啦.

學車

2007-07-06T21:50:00.000+08:00

科技男太今日考車, 一take pass, 不愧為我科技男既老婆, 哈哈!

想當年, 我跟師傅學棍波貨van, 學足30個鐘, 家下老婆只不過學左20個鐘, 仲要有10個鐘淨係學泊位調頭, 都咪話唔厲害.

以前我個教車師傅好好人, 成日比我揸架車週圍去, 係銅鑼灣左穿右插, 又試過載師傅去柴灣買粥做宵夜, 臨考試之前個晚, 仲偷偷地同我渣去一條學神唔比行既路, 結果真係考果條路線! 排隊考試時, 師傅又幫我避過佢口中所講既殺人王. 就係咁, 我都一take pass.

不過, 師傅其實出名惡, 好多師奶小姐學左幾堂就冇再學. 我呢, 其實唔覺得佢惡, 不過本著嚴師出高徒, 我反而重更加比心機學. 可能老人家都比較長氣, 每次一上車, 佢都同我講好多人生道理, 有時連屋企啲嘢都會同我講.

諗起果30個鐘, 就好似諗起一個舊朋友咁. 唔知師傅仲有冇教車呢?

中七升學

2007-07-05T15:24:00.000+08:00

响第二個blog發現咗依個地方, 名為Jupas收生成績搜尋器. 科技真係日新月異, 當年有依個搜尋器就方便好多啦.

新玩具

2007-07-04T11:26:00.000+08:00

前幾天買了一部 smartphone手機, 這篇文章便是在這部手機上面發的了, 雖然有點困難, 不過以後開會同坐車都可以上blog喇!

Levi's mobile

2007-06-28T14:11:00.000+08:00

繼Prada之後, Levi's又出電話. 今次仲有5隻色揀, 不過一睇就知部機係改自LG KE820. 要讚嘅當然係LG班marketing啦, 因為本身LG啲電話其實唔係幾好賣, 比佢諗到mobile X fashion, 殺出一條血路, 勁!

source: i4u

Are you a nerd?

2007-06-28T08:52:00.000+08:00

無無聊聊, 一早返到公司就做咗個test. 我自問都係一個正常人, 作為一個科技男technical方面其實又好屎, 點解我會有咁嘅下場......

全民皆股?

2007-06-25T21:40:00.000+08:00

有內地官員話，家下內地股民人數只佔全國人口１０％，比起美國同香港分別有成５０％同４０％係小巫見大巫，而且當中有唔少重複戶，所以未算民皆股，表現唔算瘋狂咁話．

不過，根據聯合國人類發展報告指出，中國有４７％嘅人仲生活係每日賺＄２美金以下，咁究竟中國又有幾多人有錢買股票呢？依家大陸股市日日過千億，又係咪塘水滾塘魚？

吐露天的天空

2007-06-22T15:23:00.000+08:00

很久沒有見過這麼藍的天空．前一陣子，要不是天天下著雨，要不就是天空蒙上了一片灰．午飯後，在還沒有開放的海濱公園，口中呷著冰凍的可樂，一個人走著．遠處雖然傳來地盤機械的聲音，不過浪聲和海風，將一切都拋腦後．陽光投射在肩膀上，面頰在拚命的吸收維他命D．慢慢地，背部開始滲出汗水，告訴我，是時候走出天堂，回到地獄去了．

剪指甲

2007-06-21T15:06:00.000+08:00

我諗極都唔明，點解咁多人鍾意响大庭廣眾嘅地方剪指甲．一嚟個指甲鉗”嗒嗒”聲好鬼煩，二嚟作為身身體嘅一部份，剪指甲同撩鼻屎同摔腳指好似冇乜大分別，並唔係人人都鍾意睇，點解唔留返喺屋企先做依啲私人嘢呢？

有啲阿姐，好喜歡搭巴士剪指甲，究竟佢地有冇諗果啲指甲會飛咗過隔離呢？公司又有同事鍾意响位度剪指甲，究竟係咪真係咁忙（定係冇嘢做），等唔切返屋企呢？

雞飛狗走

2007-06-18T17:55:00.000+08:00

公司嘅同事, 一個一個咁離開. 究竟幾時先到我呢? 唔通我真係賣剩蔗?

我只係想搵一份人工高福利好又唔辛苦嘅工嗻, 唔過份吖!?

天生我才必有用, 所以我決定要發揮我嘅專長: 瞓多啲到食多啲!

十年

2007-06-14T21:53:00.000+08:00

慶祝回歸，見證十年前後。

十年前，剛剛入大學，愛玩不愛讀書。十年後，依然愛玩，不過更愛讀書。

十年前，金融風暴，擔心畢業找不到工作。十年後，按曾特首說經濟前所未有地好，不過仍然擔心找不到好工作。

十年前，幻想自己揸法拉利。十年後，仍然幻想自己揸法拉利，不過都叫做有架錢七。

十年前，開始了一段戀情。十年後，已經結咗婚。

十年前，冇諗過買到樓。十年後，買得起間蚊型屋，不過唔打算買。

十年前，中學同學各散東西。十年後，竟然玩埋一堆，成為最好的朋友。

十年前，阿媽日鵝夜鵝。十年後，阿媽依然日鵝夜鵝，不過我會發脾氣。

十年前，成日掛住上網。十年後，依然成日掛住上網，有病。

十年前，我同自己講要出人頭地。十年後，我同自己講三十歲前要出人頭地。

十年前，我認為人生得意須盡歡。十年後，我依然咁覺得，不過就後悔少壯不努力。

父親節

2007-06-13T12:58:00.000+08:00

繼上個月母親節, 老豆生日加外父生日後, 今個月又輪到父親節, 真係食都食窮.

父親節其實係一個幾特別嘅節日, 因為父親節其實真係幾無謂. 其他節日好似聖誕節, 情人節咁, 可以好多慶祝方式, 買禮物又多啲選擇. 母親節呢? 因為阿媽係女人, 所以都好簡單, 化妝品燕窩頸鏈梗有一樣中. 父親節就麻煩喇, 老豆又唔打呔, 金表又買唔起, 唔通年年都送銀包咩. 所以最後結果只得一個--食餐飯算數.

大家做男人都知自己事, 返工搵錢養妻活兒係天職, 冇乜好多謝. 平時掛住應酬同啲friend玩, 好少理頭家, 要多謝都係多謝阿媽先啦, 起碼日日買餸煮飯就唔係人人做得到.

不過呢, 耐唔耐搵個藉口一家人食飯, 就冇乜所謂啦.

再生能源

2007-06-12T09:31:00.000+08:00

近幾年, 全世界都講環保. 大家用少啲膠袋, 少啲開泠氣, 總之少啲浪費, 係一件好事.

講到空氣污染, 好多人就會諗起汽車排出嘅死氣. 於是乎, 全世界就興起一股再生能源熱潮, 想搵啲嘢去代替污糟嘅石油 -- 不如用油精啦! 只要諗返吓大家樂果啲一人一鍋打邊爐, 就知道油精做燃料係幾咁乾淨. 巴西依家就用甘蔗嚟提煉乙醇, 美國人有樣學樣用粟米嚟提煉. 中國成日比人話係破壞地球環境嘅罪魁禍首, 迫於無奈都要攪吓biofuel.

前排上市嘅中糧(606)就食正個概念. 由招股價3.72升到去最高中$7.33, 差不多一個開. 不過, 有幾多一諗過, 生化能源係大陸究竟work唔work?

中國貴為全世界第二大玉米出口國, 粟米供應方面應該不成問題. 不過近期內地糧食價格上漲, 令內地玉米價格高於國際水平, 亦迫使大陸首次由美國入口粟米. 全世界通脹似乎有升溫跡象, 而商品價格亦不斷上升. 向美國由於種粟米有政府補貼, 所以好多農民都放棄cotton同soybean而改種粟米, 亦間接令綿花周大豆價格上升. 需知道粟米, 大豆等農產品對整個經濟體系牽連甚廣, 中國政府最緊要穩定, 而民以食庶天, 究竟係中國大量投放資源去發展biofuel, 合唔合乎國情呢?

乙醇响燃燒嘅時候, 排放出嚟污染物的確比傳統汽油少. 不過提煉乙醇時亦用到大量資源, 好似土地, 收割用嘅機器, 以至提煉時消耗嘅能源等. 究竟net energy gain是正數抑或負數, 科學家仍然未有定論.

仲有果啲假再生能源, 好似神華 (1088)果煤轉油咁, 消耗大量資源之餘成本亦都唔平, 如果油價唔係高企於$60美元以上, 煤轉油根本就唔合乎經濟效益.

科技男唔係唔想保護環境, 不過有時啲政客, 為咗選票而亂攪再生能源, 到頭來可能更加破壞環境都未定.

強醫金

2007-06-07T16:04:00.000+08:00

果個"至驚"智囊中心, 竟然夠膽死提出啲乜嘢強制醫療供款, 提議每月搵多過五千蚊就要科水, 真係唔得佢死.

政府想諗縮數喺人都知. 強積金已經迫人每月自動捐獻比基金經理, 若果加埋強醫金, 人工又少一"忽". 政府自己攪唔掂個醫療制度, 明知人口老化, 公共醫療開支一定會越來越大, 於是向小市民開刀, 美其名用者自付, 實則推卸責任. 試明有幾多月入一萬以上的人未有購買醫療保險? 那是否意味政府想資減少助中低收入的人士? 而有能力為自己打算的人, 又是否少了一個選擇權呢?

當務之急, 其實喺改革醫療體系, 引入更多競爭令收費下降. 不過觀乎香港嘅教育制度, 要政府進行改革, 得罪既得利益者, 機會似乎微乎其微喇.

返來喇

2007-06-04T16:37:00.000+08:00

經過差不多五個月的折磨, 終於完成了CFA Level I的考試. 這幾個月以來, 每晚放工後就是回家讀書, 星期六日還得在家中做練習, 好像沒有了自己的生活一樣. 兩個月之後便會出成績, 這後期間應該可以輕鬆一下吧.

昨天的考試場, 真的是萬人空巷, 我想大概有一萬個考生吧, 原本冷清的亞洲博覽館亦被擠的水洩不通. 考CFA原先就是想給自己多一條出路, 不過由此看來, 就算完成了三個級別的考試, 到時都只可以用人有我有去形容這個資格, 看來要跳到金融界混飯吃要比想像中困難得多.

上午的部份, 比想像中容易, 心想要是一早知道這麼簡單, 當初就不用花那麼大的氣力去溫習. 不過到了下午的部份, 戲肉終於出現, 題目要比上午的困難得多. 看來今次能不能一take pass, 還真的要求神拜佛保佑.

這個星期就暫時休息一下. 之後就要努力找新工喇.

休業啟示

2007-05-29T11:29:00.000+08:00

東主今個星期日考試, 休blog一週.

記賤米

2007-05-22T16:40:00.000+08:00

尋晚同一班兄弟聚舊食飯，席間一位兄弟宣佈快要結婚，並且將到美國修讀MBA．飯後大家意猶未盡，再去酒吧繼續吹水．星期一溜溜成兩點幾先返到屋企，攪到今日成日喺公司釣魚．

唔經唔覺，大家已經識咗成十年．科技男由細到大，識嘅朋友唔多，曾經有一段時期懷疑自己有自閉症，所以依班豬朋狗友，可以話係科技男嘅生死之交．雖然畢業後大家見面嘅機會唔多，不過一見到面，大家又自然會好似好熟咁，回復返昔日一樣咁低B．哈．

講開嗰位將要結婚嘅兄弟，我第一日見到佢嘅時候就覺得佢好乸煩．唔知係咪啲名校生都係一模一樣，硬係覺得佢好似好自我中心咁．不過，佢讀書成績好，而且多材多藝，仲上過430穿梭機，又真係囂得起嘅．

之但係日子耐咗，我就覺得佢同我有幾分相似．我唔係想講我有冇佢咁叻，只不過佢嗰種鍾意收收埋埋，份人又硬頸嘅性格，同我好鬼似．讀U嗰幾年，佢都算叫做有過人生嘅低潮，不過最後都捱過咗，依家仲要去美國讀MBA，如果份人唔係咁”倔”，都未必有依份毅力同勇氣．幾年間，睇到佢成個人真係變咗好多．由一隻”餚底獸”，變成一個真男人．

賤米，第時發咗達，唔好唔記得啲兄弟呀！

中國政府入股黑石基金

2007-05-21T15:17:00.000+08:00

黑石基金(Blackstone)宣佈，已經跟中國政府簽定協議，接受中國投資30億美元，或等同於黑石基金的10%股權．黑石基金乃美國出名的私募基金，與KKR、TPG等齊名，亦是第一間進行IPO的私募基金．

首先，一般而言，各國政府只會投資於國家債券、黃金等低風險的投資工具．公司債券或者股票的風險程度相對地已經算高，更不用說是私募基金這類高風險投資了．那麼中國政府買私募基金究竟目的何在呢？第一︰排洪．早前內地放寬QDII的限制，已經說明中央致力將過多的外貿盈餘向外投放．第二：收購外國企業．近年國企到外國進行收購，都遇上巨大的政府壓力．透過私募基金持有外國企業，可以令反對聲音減少，等到時機成熟，更加可以收歸國有，逃過一眾”反華”議員的法眼．

中國入股黑石，區區30億美金，意味今次可能只是頭炮，之後陸續有來．黑石早前在中置成立辦事處，以為會在大陸大搞私募基金，卻原來招來了中國政府這個強大後台，真不簡單．

＝＝＝

中央再次推出宏調措施，今次還要”三合一”，上調存款準備金之餘，還加了儲蓄及貸款利率．不過，以國內目前的情況來說，再多的宏調措施亦不太可能遏止炒風．現在大陸的股市就好像核爆一樣，一旦過了臨界點，就一發不可收拾，想阻也阻不了．

話說回來，為什麼每次人行加息，都以0.27厘為基準，有別於外國央行的0.25厘呢？這因為中國的利率一向以”九”，令到利率無論以月計算(除以12)，或者以日計算(除以360)，皆可以除得盡．

Dream Car

2007-05-21T14:22:00.000+08:00

科技男由好細個開始，已經係一個不折不扣嘅法拉利迷．以前砌嘅模型係法拉利，油站換嘅鐵車仔又係法拉利，總之跑車就等於法拉利．保時捷？No way！林寶堅尼？淨係令我諗起阿叻果架紫色車．

不過，科技男自問依世都唔知買唔買得起一架法拉利，所以呢佢亦只係响我嘅夢裡面出現，名副其實嘅Dream Car.

响現實中，我依家總想擁有嘅，就係．．．福士最新嘅Golf GT！

嚴格嚟講，我的最愛係Golf R32，不過要成40萬，咁貴，又係得個睇字．依架Golf GT，雖然都要成25萬，不過幻想得嚟叫做比較接近現實啦．架車仔雖然得1,400cc，但係supercharger加埋turbo，有成170匹馬力，勁！而且我鍾意自動波多過棍波，香港地揸棍波，除咗窮或者懶型之外，我諗唔到其他理由，F-1賽車都用自動波啦．福士嘅DSG六前速自動波箱，我覺得係本世紀最偉大嘅汽車發明之一．又慳油又擘得嘅車，去邊度搵．

唉，不過點勁都好，我都只能夠响放假嘅時候揸吓部錢七corolla，又或者每日放工嘅時候，欣賞吓我同事部Golf GTI．

無聊信一封

2007-05-18T08:42:00.000+08:00

科技男好鐘意貪啲小便宜，所以雖然一年坐得果一兩次飛機，都要學人申請埋啲飛行獎勵計劃．

上年科技男去美國旅行，要坐兩程內陸機咁大把，有理冇理，就走去UA個網頁度入會，當然亦同時幫科技男太申請埋啦．點知入到去填資料嘅時候，唔知係係咪歧視我地中國人，定係老婆個名似恐怖份子，竟然整極都話佢已經係個database入面．攪咗幾個字，火都嚟埋，就索性係姓名果欄入咗”Fuck You"兩個字．哈哈，竟然得咗！吹脹．

從此之後，耐唔耐UA都會寄啲信嚟，就好似依封咁．

每次諗起依件事我都覺得好好笑，查實我仲有張印咗"Fuck You"個名嘅會員卡添！本來我打算取消咗個account，因為唔環保嘛．不過諗諗吓，每次封信由外國山長水又遠咁寄到嚟香港，都可能有幾個人會因為見到個名而笑吓，都不失為一件好事吖．

無恥

2007-05-16T14:58:00.000+08:00

原本想再講吓《中大學生報》單嘢，不過睇到”呢條友”馬力嘅言論，中大啲咁微不足道嘅小事都係暫時擺埋一邊．淨係睇蘋果，信哂佢啲新聞就死得，睇埋明報、星島，完來都有報導，馬力依次冇得底賴．

＝＝＝
１９８９年６月４日．

當年，科技男仍然是小學五年級學生一名．我當時讀上午班，早會的時候就覺得氣氛有點怪異，和平日不一樣．五年班的學生站在後排，離開講台較遠的位置．我聽不清楚咪高峰裡校長的說話，不過，我卻清楚地看見了校長老師們在哭泣．

我不知道，這件事對其他十多歲的小朋友有多大的影響．可是對於我來說卻是前所未有的震撼．如果說，十八年以來從來忘記過是騙人，畢竟生活迫人，許多往事都已經一一拋諸腦後．六四集會我從來未參與過，算不上半個熱血青年．不過，每一次看到這個畫面，眼角都不其然泛起眼淚光．

中國人呀中國人，連自己的歷史都不能坦然接受，還可能要求人家日本道歉嗎？還可能做一個自稱民主的政黨的主席嗎？還有資格批判老師如何教育學生嗎？還能夠談什麼愛國的空話嗎？

要討論「屠城」是否用得恰當，就好像要討論「人獸交」、「亂倫」等字眼可不可以見報一樣毫無意義．死一個人跟死一萬個又有什麼分別？事實的本質重要過事件的表述．如果要知道當時的情況，世界上還有偉大的YouTube.

柴玲、吾爾開希等學運領袖跑到外國生活，見不得對中國有什麼建樹．他們亦只是歷史洪流中的一些過客，絕不能代表那些死者和被囚禁的人．究竟是誰先把局部當成事實的全部？

所謂知恥近乎勇，沒有膽量去自省、面對自己的錯誤，就是無恥．

Spiderman 3

2007-05-15T13:56:00.001+08:00

星期六去咗睇Spiderman 3，去之前睇過依個網頁，已經做足哂心理準備．無奈睇完套戲，都係要講句：「垃圾！」

公平啲講，第一集我都只係覺得OK，第二集已經有啲悶．個男主角唔識做戲不特止，今集重要扮白痴．上兩集扮戇直青年都算，今集想講蜘蛛俠變壞啫，點解要佢塑造成一個低能仔咁？果場係Jazz Pub嘅跳舞戲，真係好親切，完全勾起咗我對王晶嘅回憶．我心諗，雖然王晶喺攞唔到香港金像獎，不過如果佢當年去荷里活拍《精裝追女仔》，加返啲電腦特技，應該都可以收返一佰幾十億票房．

男主角唔靚仔，咁女主角當然唔慌靚得去邊，唔係點襯得起．反而個男配角就幾靚仔，不過好可惜，下一集睇唔到佢喇 (冇錯，電影公司已經計劃開拍第四五六集！)．希望個貓女可以補返數啦．

既然一早知道套戲咁垃圾，點解仲要去睇呢？冇既，想入戲院睇吓戲，近排依套大熱，唔睇好out嫁嘛．無可否認，啲電腦特技真係一集比一集進步嘅．諗真啲，其實導演一早單哂眼，事關Spiderman一句：「You always have a choice」，講明你係咎由自取，唔好再批評喇！

仲有，無啦啦打打吓都要整支大美國旗出嚟，真係忍唔住要係個位度爆句粗！

中央十年回歸之賀禮

2007-05-14T09:02:00.000+08:00

正如上個星期所講，大陸終於用QDII嚟排洪．

報紙話QDII有成一千多億港元會流入香港，炒起香港股市．其實中央今次放寬QDII，短期嚟講心理作用大於實際，試問如果你係基金經理，明知依幾日港股必被炒上，會唔會入市高追？不過長遠嚟睇，多咗一個渠道去為AH股套戥，亦有利國企紅籌股嘅穩定．

上星期五，匯控、中壽、中石油等已經喺美國ADR市場急升，今日要追貨可能已經太遲．倒不如留意A、H股有大折讓而又有合併收購私有化概念之股份，好似上石化(338)、儀征化纖(1033)．再唔係齋炒折讓，睇吓洛陽玻璃(1108)、熊貓電子(553)．不過炒時炒，記得識睇位走人．

長遠啲睇，一輪收緊銀行貸款之後，睇嚟大陸已經冇哂符，唯有將啲遊資用QDII轉去第二度，斬腳指避沙蟲．無計，嚟緊回歸十週年，出年又有北京奧運，試問邊個夠膽整死個股市．落藥調整可能有，股災就機會唔大．膽大嘅可以入貨買中資股，冇膽而又有貨嘅都唔駛咁快走人，事關股市要你滅亡，必先令你瘋狂．

後加:
原來洛陽玻璃停咗牌，衰咗．

勇氣

2007-05-11T09:24:00.000+08:00

中大禁情色版將懲學生總編誓言照出影視處交審裁處評級 (明報)
http://www.mingpaonews.com/doc/cupa
性，從來都唔應該分對與錯．出情色版寫性文章，亦都唔算係罪．不過，社會一直以來都為性作道德審查，例如１６歲以下唔應該有性行為，又或者肛交係犯法等．咁究竟依啲法例又有冇錯呢？唯一可以講嘚嘅係，依啲”規舉”係約定俗成，係"一般人"認為啱嘅事．

份情色版嘅內容，講真冇乜料到．要以”貫輸性知識”為己任，我諗好多大學生(甚至中小學生)嘅性知識都更加充足．要探討性問題，又冇乜insight．講咸濕？求其係Google搜尋一下都好睇過份嘢．

而家各方聲討中大學生報，一啲都唔出奇，弊就弊在班編輯死唔認錯．唔好講乜嘢言論自由，你份學生報係邊個比錢攪？咪啲同學同埋大學囉．老闆覺得有問題，一係認錯，一係扮偉大劈炮，唔好扮可憐好似好委屈咁．唔好妄想自己成為捍衛言論自由嘅鬥士喇！

後加：
其實班同學只係《中大學生報》嘅暫託人，佢地又有乜嘢資格將學生報嘅聲譽同佢地自己嘅前途押上一注呢？如果最尾成班人真係為咗依件事比人踢出校，又點同屋企人交代呢？

===

異國保安為老拍檔捱拳同遭綁劫見真情 (明報)

一句「唔好搞阿叔」，唔係人人都可以講得出口．雖則個看更都幾大份，不過對住７個大漢，依份勇氣就真係直得表揚．唔知個阿叔會唔會請佢食返餐呢？

===

女跳樓母悔逼她讀大學 SMS留遺言從事地產壓力大 (明報)

三十歲真係人生一個重要嘅關口．依幾年斷斷續續好多廿歲到尾大學生跳樓嘅新聞．一般大學生畢業，二十歲出頭，做咗幾年嘢(又或者幾年冇嘢做)，差不多三十歲，覺得自己一事無成，多少有啲壓力．正所謂”男人三十而立”，家下男女平等，女人都有好大嘅工作壓力．尤其是當屋企人仲有果種"大學生係天之驕子”嘅心態嘅時候，自己俾自己嘅壓力就更加大，一諗唔通，就自尋短見，可惜．

港燦再生

2007-05-10T11:17:00.000+08:00

見到港燦個blog竟然返生, 究竟港燦兄幾時先重出江湖呢?

A, B也瘋狂

2007-05-09T18:06:00.000+08:00

今日A股又再創新高, 上海A股突破4000點大關. 不過B股亦都唔弱, 上海B股弓及深圳B股分別上升6.8%及4.8%. B股升唔停, 睇嚟外資見到A股咁激, 都想加入玩埋一份. 依家係大陸, 你今日開戶口買是但一隻股票, 第二日就有錢賺, 唔怪得每個星期有成一佰萬人開戶口啦.

而家係大陸, 通街都係股神. 街頭巷尾公司裡面人人都炒緊股票, 好有"大時代"feel. 依種時勢, 只有傻瓜先可以賺到錢, 稍為有啲理智嘅, sorry, 啲錢唔到你賺.

股市有上有落. What comes up, must goes down.

環球投資慨覽

2007-05-08T15:02:00.000+08:00

個名好似好"行"咁, 其實係班門弄斧, 目的純粹想記低自己一啲想法.

美國
=====
新公佈的經濟數據比預期好, 加上有收購合併活動, 帶動美股上升, 這次亦是80年來最長的升浪. 不過房屋銷售持續疲弱, 就業數據亦較預期差, 反映美國經濟前景不容太過樂觀.

市場憧憬聯儲局將於下半年減息, 以避免經濟大幅放緩. 根據以往經驗, 大部份對減息的預測均不太準確, 而且美國通脤仍然維持在2%上面, 要學院派的伯南克減息, 未免太過想當然. 究竟美國樓按問題會否加劇, 以至影響美國甚至全球經濟, 實在言之過早. 可是, 道指P/E現在只有19倍左右, 大跌機會似乎不大. 而且美元繼續走低, 將有利美國出口, 舒緩樓市所帶來的壞影響.

歐洲
=====
歐洲經濟持續向好, 德國經濟增長強勁, 法國大選後經濟有望得到改善, 英國樓市反彈等因素均有利歐洲股市. 雖然西班牙樓市轉趨向緊張, 意大利經濟依然低迷, 不過似乎並未影響到區內其他國家. 而且, 英國及歐洲央行仍然要加息以壓抑通脹, 英鎊及歐羅有一定支持, 加上歐洲國家多以內需為主, 歐股應可持續看好.

中國
=====
上海, 深圳股市不斷突破歷史高位, 內地股民亦有非理性的跡象. 內地A股市盈率已經接近40倍, 過去一年升幅亦超過200%. 不過高處未算高, 況且內地資金充裕, 而內地人民及企業只能夠投資於A股市場(QDII規模相對地少), 要預測A股泡沫何時爆破, 恐怕只有天通曉得. 而且, 牛市最瘋狂的一刻, 亦是股市升得最厲害之時. 要火中取栗, 未嘗不可, 不過切記要嚴守止蝕.

香港
=====
隨著環球股市上升, 恆指亦嘗試突破21000點的新高. 現時恆指P/E只有15倍, 藍籌股亦有業績支持, 下跌空間不太, 不過美國經濟有機會放緩, 加上內地可能再推出宏調措施, 港股短期大升空間有限. 要注意的是, 中國外匯儲備持續上升, 低利率令到資金泛濫. 人行雖一再提高準備金, 又向各項稅收埋手, 金融房屋炒風依然熱. 加息理論上可以令貸款放緩, 不過同時亦會為人民幣帶來升值的壓力, 非上策也. 近日, 就傳出工行提出收購Travelex, 不排除內地金融機構為求"排洪", 會跟外國企業一樣進行重組合併, 甚至乘機收購外國公司. 因此可以留意國內有需要進行整合的行業, 或者是持有QDII的機構.

頂包案與婆婆

2007-05-07T18:10:00.000+08:00

日光日白揸大膽車, 個細路唔生性嗻, 點解個大人要一齊癲? 依家撞死人, 如果真係成功頂包, 個細路又係唔係可以相安無事咁生活落去呢?

睇電影新聞, 個婆婆哭得死去活來, 仲喺地下碌嚟碌去, 睇見都心酸, 亦可以想像到孫仔嘅死對佢有幾咁大嘅打擊. 希望警察早日破案, 水落石出啦.

最佳導演?

2007-05-04T08:27:00.000+08:00

依個星期, 生果日報每日都報導係吉野家"唔小心"吞咗口釘落肚位哥哥仔, 圖文並荗咁追蹤粒釘係佢身體入面嘅位置, 好似一位探險家係亞馬遜河流域探險, 又好似太空人去登月一樣咁.

今日佢地就報導話條友"原來"自編自導自演, 想屈吉野家賠錢. 其實有少少腦, 都此諗到冇可能食食下兜飯會吞咗粒釘啦. 成三寸長喎, 係咁二趙下都"吉"親啦. 生果報仲話條友玩殘吉野家, 計我話係生果報想玩殘人至啱.

其實要屈人錢, 都唔駛去到咁盡要吞釘丫, 求其放啲烏蠅曱甴咪算啦. 話時話, 生果報好似有買新聞嘅前科, 唔通 ...

==========================================================
11 歲天才跳樓死

睇到依類新聞, 個心都幾唔舒服. 與其怪個阿媽害死個仔, 其實啲報紙又何嘗唔係共犯? 攞個乜嘢數學獎就話係天才, 啲壓力咪就係咁嚟. 自己做阿爸阿媽嘅又唔係叻得去邊, 點解要迫到個仔去死? 11歲, 應該玩多啲, 開心啲. 如果個仔真係人中之龍, 唔駛迫佢都會成功. 仲有點解一定要個仔做數學"天才"? 計數叻真係大哂?

檸檬茶

2007-05-03T11:31:00.000+08:00

咁多人交功課, 等我都作返篇先. 不過我諗如果我真係交依篇文, 睇怕都係攞零分喇.

伸延閱讀:
http://ngszehin.mysinablog.com/index.php?op=ViewArticle&articleId=559086
http://fafa99.no-ip.org/archives/2007/04/30/240

==========================================================

炎炎夏日，除了躺在沙發上動也不種之外，最好的享受莫過於呷一口冰凍的檸檬茶。

屋外面傳來嘩啦嘩啦的蟬叫聲，彷彿在對悶熱的天氣發出控訴。一陣陣清風透過窗框吹著頭髮、吹過耳朵，好像要說什麼似的。今個夏天好像過得特別漫長；中學會考剛剛完畢，同學們有的在做暑期工，有的正在忙於準備到外國升學。而我呢？就只有這樣動也不動地呆在家中。

我看著玻璃杯，檸檬茶裡的冰塊漸漸地溶化。杯外面擠滿了水珠,似乎要和我額頭上的汗水賽跑，而我也懶得去干涉這場鬥爭。電視機關上了，收音機也關上了，除了風聲，就只聽動自己沉重的呼吸聲。我盡量嘗試讓腦海變成空白，可是在心深處卻有一把聲音向我呼喚，我盡量嘗試不去想太多自己的事，可是腦海裡卻總是想著前面要走的路。

究竟人生的意義是什麼？我活過只有十多個年頭，要找到真正的意義，恐怕言之尚早吧。我讀書成績不算差，雖不致於名列前茅，但總算盡過了力。會考的成績我並沒有太大的期望，只要能順利升學，以後的事就等將來再想吧。不過我的父母親倒是比我來得著緊，要是栽了在我手上，那麼這些年來他們花的心血豈不是白費？

在過去的學校生涯中，究竟我得到了什麼？每天上課，小息，午飯，上課，之後再上補習班，晚飯前完成功課。偶然放學後會打打籃球，星期天就和同學去看電影。只是，這樣的生活要維持到幾時呢？或者，這樣的生活可以維持到幾時呢？這個暑假結束後，又有幾多個朋友會再次見面呢？想到這裡，我的心就不其然往下沉。雖說生老病死乃人之常情，但為什麼我沒有拒絕長大的權利？

也許，幾年後我會明白到這一切背後的意義。也許將來並沒有我想像中的那麼恐怖。不過，在這個可能是我人生中最後的一個夏天，我唯一想要的，就是做一個平凡人，和喝一口平凡的檸檬茶。

澳門5.1遊行

2007-05-02T08:32:00.000+08:00

究竟係啲工人示威, 定係啲警察示威呢?

噚日睇新聞報導澳門勞動節有市民上街遊行. 本來5.1遊行冇乜問題, 而且相比起外國, 澳門算少兒科.

雖然唔知前文後理, 不過從電視畫面睇到, 示威人士同警察有啲衝突, 又有啲混亂. 但係唔知點解, 前線得果十零廿個著螢光衫嘅警察, 手"橋"手"餚"哂底咁, 跟手仲有個外天開咗幾槍. 雖然咁示威者手無寸鐵, 但係就好似唔多驚. 事後, 幾百米外有途人好黑仔咁中咗流彈, 而澳門警方就話開槍係合情合理云云.

究竟嗞防暴警察去哂邊? 澳門警察又係唔係知有橡膠子彈, 或者催淚彈之類嘅嘢呢? 我諗澳門啲警察應該睇吓香港世貿示威餅錄影帶喇.

另一方面, 又有人投訴澳門警察打人. 其實我地亞洲人示威都好和平, 睇吓土耳其果邊, 拉咗580人, 喊打喊殺咁. 啲鬼佬示威, 次次都攞架生打大交, 我地依啲好小事啦.

之前網上面有人批評港台DJ抹黑澳門. 不過從今次事件嚟睇, 澳門人除咗有錢咗之外, 其他方面都有待改善喇.

咖啡

2007-04-30T14:17:00.000+08:00

我好鍾意飲咖啡, 曾經試過一日飲兩三杯, 不過自從上次胃痛入醫院後, 依家一個星期係一杯起兩杯止.

係好耐好耐之前, 八佰伴有間叫"糧友"(註)既日式咖啡店, 裝修得好靚, 中間有個bar枱, 旁邊有幅落地大玻璃, 可以一邊飲嘢一邊望吓街. 我記得以前一個tea set, 有一件蛋糕一杯嘢飲, 要成十幾廿蚊. 十幾年前對於一個學生哥嚟講好多錢嫁喇, 所以我都係耐唔耐屈阿媽請我先有得去.

每次去到, 我都會比bar枱上果啲Syphon(中譯:虹吸式咖啡壺)吸引住. 果陣時對咖啡知道嘅唔多, 頂多聽過藍山咖啡好貴, 同去茶餐廳時會叫杯凍啡. 個coffee syphon分上下兩個玻璃球, 先將凍水放入下面個壺, 然後將咖啡粉放在上層, 再用酒精將水燒熱. 滾咗嘅水就會被吸上上層和咖啡粉混合, 冷卻後會水滴返落下面, 一杯咖啡就咁完成. 我每次去到, 例牌眼定定望住依個過程, 幻想自己有朝一日可以買返個係屋企玩吓.

冇幾耐之後, 有人送咗一個咖啡機比我, 係大家喺電器鋪最常見到果種. 依種咖啡機用嘅方法叫filter drip或者auto drip, 就係將啲水煮熱(或者變成水蒸汽), 再淋向咖啡粉上而等佢慢慢滴落嚟. 講真, 我覺得drip coffee係世界上最難飲嘅咖啡. 一來啲咖啡好似水咁, 二來個filter好容易整到啲咖啡有怪味. 不過依種咖啡係美國好流行, 就係你向Starbucks或者Pacific Coffee可以叫到嘅Americano喇. (美國人鍾意食垃圾係人都知)

大個咗之後, 發現到有一樣嘢叫french press. 依種壺除咗可以沖咖啡外, 重可以攞嚟沖茶. 用嘅方法好簡單, 只要將咖啡粉放入壺中, 加入熱水等兩至三分鐘倒返出嚟就得. 由於水同咖啡接觸嘅時間比較長, 因此沖出嚟嘅咖啡亦會比較"哽". 用french press最難嘅地方係, 如果咖啡磨得太粗就唔出味, 磨得太幼嘅話就隔唔到啲咖啡粉, 攪到成口渣. 因為咁, 我就走咗去買一個手磨咖啡機, 買啲咖啡豆返嚟自己磨, 等我可以控制咖啡粉嘅粗幼度.

出嚟做嘢之後, 飲得最多嘅就係即溶咖啡. 依家公司只係提供最cheap果隻雀巢咖啡, 好話唔好聽同飲垃圾水冇分別, 比少少錢買罐雀巢金牌咖啡好過. 曾經試過一款Cap Columbie, 一般超市可以買到. 佢味道比較濃, 最啱晨早提提神.

自從引入咗Starbucks之後, 香港人就多咗嘆咖啡依樣習慣. 好多人話Starbucks唔好飲, 又話連鎖店好飲極有限咁. 計我話响未有Starbucks之前, 大部份香港人連espresso係乜都未必知, 到依家個個識得叫latte, cappuccino, Starbucks都有佢嘅功勞. 至於Pacific Coffee, sorry, 真係冇乜邊間好飲, 唯一吸引之處就係佢啲紅色梳化.

就係因為Starbucks, 令我認識到意大利咖啡. 冇錢買部幾千蚊嘅espresso機, 唯有買個窮人咖啡壺-Bialetti Moka Express. 聽聞依種咖啡壺每一個意大利人屋企都有一個, 真定假就無從稽考, 不過花少少錢就可以隨時响屋企飲到杯好味嘅咖啡, 真係一樂也. 為咗可以整杯夠滑嘅latte, 我仲特登買咗個奶泡器, 可以用係微波爐嫁.

註: 原來間咖啡店係叫"糧友", 並非"良友". 多謝路人A指點.

工作與寫Blog

2007-04-26T13:53:00.000+08:00

尋日搵到一個叫WorkSmart嘅網頁, 係英國一班工會, 用嚟傳達一啲訊息比打工仔. 當中有個topic叫"Blogging and Work", 內容大慨係要提醒打工仔如果工作上嘅人同事寫係blog度時要小心啲. 其中有人段咁寫:

"Blogging about existentialism or football may be harmless, but discussing your boss, your colleagues or any aspect of your work could lose you friends, cost you your job and even land you in court facing a defamation suit."

我都成日寫公司啲嘢, 死火! 重有, 睇得我個blog啲人都知我係邊個, 萬一我寫啲嘢揚咗開去比同事睇到咪大鑊??? 不過諗真啲, 依度個hit rate近乎零, 邊有人會睇到丫. 怕且我係公司比老細睇到我偷懶寫blog嘅機會仲高啲.