每日一字

Megaphone - 大聲公
Man up - 即係man啲
Horizontal challenging/Generously proportioned - 即係肥

小勝一局

終於可以鬆一口氣．log in的時候，心跳加速，手震腳震．四個月的努力沒有白費．

Level 2，明年六月再見！

學車

科技男太今日考車, 一take pass, 不愧為我科技男既老婆, 哈哈!

想當年, 我跟師傅學棍波貨van, 學足30個鐘, 家下老婆只不過學左20個鐘, 仲要有10個鐘淨係學泊位調頭, 都咪話唔厲害.

以前我個教車師傅好好人, 成日比我揸架車週圍去, 係銅鑼灣左穿右插, 又試過載師傅去柴灣買粥做宵夜, 臨考試之前個晚, 仲偷偷地同我渣去一條學神唔比行既路, 結果真係考果條路線! 排隊考試時, 師傅又幫我避過佢口中所講既殺人王. 就係咁, 我都一take pass.

不過, 師傅其實出名惡, 好多師奶小姐學左幾堂就冇再學. 我呢, 其實唔覺得佢惡, 不過本著嚴師出高徒, 我反而重更加比心機學. 可能老人家都比較長氣, 每次一上車, 佢都同我講好多人生道理, 有時連屋企啲嘢都會同我講.

諗起果30個鐘, 就好似諗起一個舊朋友咁. 唔知師傅仲有冇教車呢?

中七升學

响第二個blog發現咗依個地方, 名為Jupas收生成績搜尋器. 科技真係日新月異, 當年有依個搜尋器就方便好多啦.