搵工

其實, 我搵緊工.

依幾日好努力咁update自己份CV, 又不斷咁喺 jobsdb.com, Classified Post同 Monster.com搵工. 不過問題又嚟喇: 究竟我可以搵啲乜嘢工? 以下係我諗到嘅幾樣:

1. 做返engineer. 不過我寫program唔叻, 又唔識整PCB, 剩係識做IC. 最弊係十隻手指數得出全香港做IC嘅公司. 死得.

2. Technical Marketing. 轉吓post, 識多啲唔同嘅skill. 不過我冇marketing/business底.

3. Technical Writer. 寫嘢我ok喎 (依個Blog除外). Product spec, technical paper 我年中寫唔少, 不過喺香港多數由engineer哽埋.

4. Equity Research. 依個暫時只係幻想. 依家好努力咁讀CFA, 希望第日有機會啦. 殘念.

睇完大鐵鎚依遍"身價", 我反省咗十秒究竟自己做嘢有冇盡到力. 我嘅答案係: 冇! 係我係懶, 仲要係好懶, 但係我都有試過為咗完成一項工作而廢寢忘餐. 點解我會對依家份工咁冇熱誠呢? 講真我由year 3開始已經想做一個Hardware Engineer, 點解花咗咁多時間依家先話冇興趣呢?

有時我會諗, 當初A-level, 如果我冇為咗安安定定打好份工, 揀咗電子工程而放棄咗讀傳理電影, 依家究竟會點!? 又或者我冇因為鄙視BBA剩係識吹水而冇揀商科, 今時今日會唔會已經係年薪百萬嘅中產階級呢?

無論點都好, 錯咗都冇得返轉頭, 唯有向前望. 我份人好唔專心, 唔可以成日做同一樣嘢. 如果大家有乜嘢好工, 記得單聲喇!

Madonna Confession Tour DVD

前幾日心血來潮, 喺旺角買咗Madonna新出果隻Confession Tour, 但喺到咗星期六先至有機會喺屋企"焚機".

隻碟有DTS 5.1, 論音效無得彈. 不過個演唱會最精彩嘅係visual effect. 無論係Madonna嘅演出, Dancer嘅表演(尤其係Free Runner果一幕, 臨尾踩雪屐娘得嚟又幾型), 抑或個舞台嘅design, 都堪稱一絕. 最重要係隻DVD嘅director, 佢嘅mixing/editing技巧實在令到個演唱會由好好睇變成勁好睇.

DVD部份有成二十幾首歌, 隻隻歌都咁好聽. DVD+CD一set, 都只係賣 $118, 認真底到爛 (DVD only平$10). 其實就算賣$200我都覺得值. 今次終於可以一洗Michael Jackson隻DVD對我留低嘅陰影喇.

開工大吉

豬年第一post, 在此祝願各位親朋好友, 豬事暢順, 豬籠入水, 豬圓玉潤......

今日豬年第一日返工, 雖然已經年初五, 不過同事們逗利是之熱情似乎仍未減退. 剛剛回到座位, "恭喜發財"之聲就開始在耳邊發炮. 不消十分鐘, 準備好的利是經已派出大半. 幸而我份人好低調, 上年結婚之消息並未傳遍公司, 令面前未至於出現排隊提款的人龍.

已經收到小弟利是的人, 對不起, 我未有受惠於狗年AH股狂升, 亦未曾持有過五保三行, 未能體驗"十年來最好的一年", 因而未能如新聞報導說封$100利是, 或許明年有機會吧!

以前聽人說"年關難過年年過", 現在終於有所領會.

拜早年

今日年廿九, 好快就過年.

中國人過新年, 第一句通常都係"恭喜發財". 錢雖然重要, 不過人越大, 就越覺得健康最緊要. 身邊親朋戚友, 個個冇病冇痛, 就多多錢都買唔到.

蜜運中嘅人, 好快啲拉埋個天窗喇. 我未結婚之前, 以為拍拖耐咗, 結唔結婚都冇乜分別, 畢竟兩個人一齊已經成十年. 但係結婚之後, 感覺真係唔同咗, 就好似人生再一次起步咁. 依種感覺就好似食咗興奮劑, High High地, 背後多咗一份推動力咁. 唔明? 唔信? 到時你未知囉.

重有, 想祝我發財嘅, 係麻雀枱上識做啦; 想祝我添丁嘅, 就唔駛喇.

最後同大家拜過早年: 希望豬年所有人都身體健康 , 萬事如意.

開會

每逄星期四下午, 科技男都要跟星州同事做conference call. 個會係project manager定落, 原意係希望兩team人定期update個project嘅進程, 限時一粒鐘.

不過整整吓, 個會由最多一粒鐘, 變做最少一粒鐘! 其實每個人只需要用五分鐘就講完要講嘅嘢, 點解仲要成班人坐定定, 浪費時間? 可唔可以大家開會前先send個report比team leader, 然後整個summary做briefing就算呢? 留返啲時間比Q&A session好過喇!

其實我好憎開會, 因為大部份會議都係好無謂. Setup個meeting, 原本係想大家為一啲問題作討論, 搵出解決方法, 又或者係上司想向下屬傳遞一啲訊息. 但係好多人就為開會而開會, 事前不單只冇準備 (連agenda都冇!), 又要請啲唔關事嘅人嚟. 雖然我好多時唔係上緊網就係寫熙blog, 不過都唔好搵我嚟攪吖! 齋坐好悶嫁.

有時我會諗, 係大學果陣時攪吓活動, 對日常工作都有啲用. 起碼如果比我hold個會, 我一定會以盡快開完為首要任務!

情人節

二月十四日，情人節．

我每天大清早六點半起身梳洗，七點出門時老婆才起來．不過今日有少少特別，因為我放了一份小禮物在老婆的化妝箱旁邊. 究竟老婆會不會留意到呢？

九點鐘去HR交份form的時候, 見到好多女同事都已經收到花．行過reception，又撞見有女同事收花，加上幾位同事在旁贈興，女同事喜悅之情不言而喻．

今年我並沒有買花送比老婆．一來太花錢，二來年年送花好像沒有新意吧．雖然我老婆口口聲聲話情人節不要亂花錢，可女人都口是心非；看見其他人都收到鮮花，心裡會否酸溜溜？越想就越害怕，頭皮發麻．．．

雖然沒有情人節大餐，沒有玫瑰花，不過一起吃晚飯，說說笑，散散步，也可以很浪漫吧．

老婆，我愛你．

白車

琴晚瞓到三點幾痛醒咗, 本來諗住搵間24小時診所睇醫生, 不過最後頂唔順, 坐白車去咗急症室.

今次係我第二次因為胃痛而去醫院, 上一次係好多年前. 果次我同女朋友行行吓銅鑼灣, 突然間個胃痛到成個人企都企唔到, 就即刻叫的士去葛量洪醫院. 我係醫院道典咗三個幾鐘都未睇到醫生, 最後冇咁痛就自己走咗, 所以我今次都好唔想去醫院.

話時話, 今次係我第一次坐白車. 我三點鐘痛醒, 四點鐘上救護車, 成六點鐘先走人. 初頭醫生驚我個胃穿咗, 就幫我照X光, 好彩冇事, 只不過係胃炎加發燒. 醫生又問我係唔係好大壓力, 點解個個醫生都以為我抑鬱症??? 可能我真係有自己唔知...

胃抽筋果種痛比死更加難受, 非筆墨所能形容. 今個星期睇怕只能夠食粥喇.

平面電視

上個星期終於買咗部32吋LCD電視, 將部只係用咗兩年嘅25吋CRT送比阿媽. 我阿媽其實好唔開心, 因為佢都想買部平面電視好耐. 雖然我好想買部37吋, 不過老婆話屋企細, 唔比買咁大, 冇計.

講起上嚟, 我真係要寫個”服”字比阿媽, 因為當大部份人只知道LCD TV薄啲同貴啲嘅時候, 我阿媽竟然講得出LCD同Plasma嘅分別! 佢重話依家啲LCD TV嘅解像度通常都係1366x768, 遲啲會出1920x1080云云, 又問我乜嘢叫Full HD! 身為電子工程師嘅我, 重以為比個客問緊嘢…

由於工作關係(笑), 我經常溜漣喺avbuzz.com, av-forums.net等網站, 睇到好多人對LCD/Plasma電視有好多誤解. 就好似:

1. Plasma 睇電視一定靚過LCD.

2. 部電視support Full HD畫面就一定靚.

3. 睇DVD, 1080i一定靚過720p.

4. 部電視用乜嘢panel最重要.

首先, Plasma 睇電視, 一般嚟講係啱嘅. 傳統PAL電視訊號大約704x560, NTSC就720x480. 一般LCD TV解像度達1366x768, 最新的甚至達到1920x1080. 電視訊號需要放大才能擴展至全畫面. 而舊款Plasma TV解像度通常都只係800x480, 因此電視訊號並不要作大幅放大, 當中畫面的瑕疵亦自然比較少, 所以一般用家便認為Plasma 睇電視一定靚過LCD. 隨住Plasma TV解像度的提升, 這個”優勢”亦將會慢慢減少.

依家新出啲Flat TV, 部部都以支援Full HD (即1080p/1080i) 輸入做賣點. 究竟Full HD輸入係咪咁重要呢? 其實如果你部電視嘅解像度唔係1920x1080 (Full HD), 有冇1080p/1080i 輸入真係唔太重要. 因為就算電視機support 1080p/1080i, video訊號出畫面前都會被縮細, 這個過程中亦無可避免地製造一些瑕疵. 反而如果電視解像度係1366x768, 以720p (即1280x720) 作輸入, 訊號可能不需被放大/縮細反而令畫質得以保存.

買咗部LCD/Plasma, 就梗係想感受一下高清嘅視覺享受. 不過Blu-Ray, HD-DVD尚未成熟, 機同碟都好貴下, 好多人就買會部有Upscale功能嘅DVD機嚟睇DVD. 好多人都以為1080i輸出, 就點都靚過720p, 原因係1080i解像度高過720p好多. 不過, 1080i是隔行掃瞄格式, 而720p是逐行掃瞄格式, 如果部電視有返咁上下大, 好似42吋或者係60吋投影機., 畫面就可能因為隔行掃瞄而出現”閃爍”的情況及影響畫質.

好多人買電視嘅時候, 只係會留意部電視用乜嘢panel而忽略其他重要部份. 舉例說, 如果電視解像度為1366x768, 無論睇電視抑或DVD, 畫面都有可能需要被放大/縮細, 此時電視所用的訊號處理器就有舉足輕重的地位. 又好似LCD的背光, 有些技術可以令同一款panel有更好的顏色表現. 因此電視用什麼panel對畫質並沒有絕對的決定性.

最後我想講嘅係, LCD TV最起碼要買37吋!

領匯

近日鄭明訓離開領匯, 市場就憧憬領匯可以爭脫政治包袱, 大幅加租而增加收入. 我從來沒有考慮買入領匯, 因為我本身對REIT興趣不大. 一般人買領匯原因不外乎:

1. 房委會以往為官僚架構, 資產私有化後, 只要營運效率有"少少"提高, 收入必定大幅增加.
2. 分拆概念, 憧憬TCI會將領匯拆骨出售.
3. 加租, 引入高檔品牌以提升租金收入.
4. 資產增值令估值上升, 借錢再收購物業而增加盈利.

以上幾點, 除四點外我有所保留. 因為:

1. 無疑私有化後, 領匯旗下物業的管理必定比房委會做得好. 不過除了久不久見到商場舉行節日活動之外, 不見得比以前有大分別.

2. 報紙講過, 政府又講過, 不再重複, "唔駛諗".

3. 高檔品牌似乎只適合九龍/香港島某幾個商場. 坐落屯門/天水圍的, 難道有資格大幅加租? 正如方卓如所講, 要"在 樂 富 商 場 排 隊 買 LV ， 在 牛 頭 角 露 天 茶 座 飲 high tea"?

4. 香港經濟持續向好, 資產價格上升的確有利舉債. 不過我懷疑TCI會迫領匯借錢, 然後派特別息將錢放落袋, 此乃不少對沖基金常用之手法.

考慮到對沖基金的高強本領, 領匯的確有幾份投機的價值. 不過領匯現價比其資產淨值有接近50%之溢價, 投資領匯又是否值得呢?

升職/加人工

又到農曆新年, 很多公司都會在這段期間發放花紅, 以及跟同事商討升職/加人工等事宜. 不過, 我公司就慣於四月才發花紅, 六月先加人工. 所以近排聽到身邊朋友都升職加薪的時候, 都不期然嘆一口氣.

我有理由相信, 公司四月先出花紅, 是因應公佈業績的財務安排而作出的決定, 亦不能是排除公司為免同事攞完bonus就跳槽的技倆. 對於同事來說, 比人遲三個月先有花紅絕對"人神共憤".

說實在, 作為一間local的科技公司, 我公司過去幾年都有加人工, 又有bonus派, 都算難得. 但不要忘記, 我公司basic出名比外面低是事實. HR成日話個package不單只有basic, 亦要計算bonus呀, option吵. 嘩, 如果冇又點?咁我未變成廉價勞工? 好似今年, 公司生意不及去年, 我份花紅認真危危呼.

重有, 要記得如果今年公司加你人工少過3%, 就即是減你人工!

鱈魚

食咗阿媽喺吉之島買嘅之後, 個肚唔舒服, 休息一天.

Rocky VI

星期六冒住被誤以為“斷背”嘅危險，兩個男人去咗睇“洛奇”第六集. 雖然只不過＄３０一張飛，不過係十點半早場．我初初以為要人星期六晨咁早起身去睇戲，都唔慌多人啦．點知去到戲院，已經有成十幾二十個麻甩佬等入場．

未睇套戲之前我完全唔知道劇情，對套戲亦冇乜大嘅期望．入場只不過係想搵返D“集體回憶”．成套戲我覺得根本就係史泰龍自己嘅投射：退休嘅出名拳王，為咗心中果團火而復出，最後證明比全世界睇意志可以戰勝年齡．

以史太龍六十歲高齡，重出江湖拍Rocky，套戲未上畫已經比人笑佢太老．不過我諗每一個睇完套戲嘅人，都會對史太龍肅然起敬．辜勿論史泰龍胸有幾dum，劇情有幾普通（講真有D“娘”），史泰龍想帶出嘅訊息，對人生嘅想法，實在值得深思．

唔知點解，套戲令我諗起周星馳嘅少林足球．當然，比較起上嚟，周星馳重未夠班．

其中史泰龍鬧仔果一段，我真係覺得好有意思，以下係copy返嚟嘅節錄：

「Let me tell you something you already know. The world ain’t all sunshine and rainbows. It is a very mean and nasty place and it will beat you to your knees and keep you there permanently if you let it. You, me, or nobody is gonna hit as hard as life. But it ain’t how hard you hit; it’s about how hard you can get hit, and keep moving forward. How much you can take, and keep moving forward. That’s how winning is done. Now, if you know what you’re worth, then go out and get what you’re worth. But you gotta be willing to take the hit, and not pointing fingers saying you ain’t where you are because of him, or her, or anybody. Cowards do that and that ain’t you. You’re better than that!」

諗返轉頭，戲入面有好多句對白都係"you ain't better than me"．而史泰龍想帶出嘅理念，就正正係絕對唔好睇少自己．

出字幕果一刻，我真係想起身為史泰龍鼓掌．身為工程界一份子嘅我，成日話香港工程師人工低，冇前途，自怨自捱．從今日開始，為咗自己，為咗老婆，為咗屋企人，我要努力，務求脫離工程師嘅行列！

血鑽

我諗對於大部份男人嚟講, 一粒鑽石同一舊炭真係冇乜分別. 弊在係女人眼中, 鑽石係有一種無可替代嘅地位.

雖然我冇睇過里安納度套"血鑽", 亦都冇深究過套戲入面所講嘅故仔有冇作大, 不過我就好認同每一粒鑽石背後都係有血有淚. 無論粒鑽石係老公/男朋友買比老婆/女朋友, 抑或係D女人買比自己, 諗起比咁多錢買粒丁屎咁細嘅石頭, 個心點都會有D嗱住嗱住.

係我未買隻介指向我老婆求婚之前, 我都花左D時間去研究鑽石依樣嘢. 乜嘢係4C呀, Girdle呀, GIA呀, 上網睇左一輪, 又去D鋪頭混下吉, 好似識好多咁. 求婚喎, 要買就梗係買最好嘅, D Color, VVS1, 56% table唔少得啦. 點知去到間鋪頭一問, 嘩!真係要發左達先比得起, 仲要訂貨添呀. 冇計啦, 唯有退而求其次, 細粒D, 色低D嫁啦.

我果晚坐左係間金行成晚, 由六點幾坐到十點幾成四粒鐘, 初初粒粒石都睇唔上眼. 個sales一時叫人幫我係旺角攞D石過嚟, 一時又係尖沙咀攞D石過嚟, 成個大客咁, 最後揀到粒滿意嘅, 又要講一輪價. 講真其實我都幾唔好意思, 又唔係買粒幾卡嘅巨鑽. 隔離D自由行買十幾廿萬嘢, 唔駛三個字就搞掂, 我依D細客仔, 買果少少嘢, 阻左人地成晚, 真係冇陰公.

最後當我比左錢, 攞住隻介指走嘅時候, 個心就只係希望我果半年人工唔會就咁白費啦.

飛來email

我諗每一個公司有email嘅人, 都曾經收過一D自己唔應該收到嘅email. 但係如果你收到嘅email係大老細send出嚟, 仲要係鬧D大粒佬鬧到PK嘅email, 咁你會點呢?

1. Reply 返, 叫佢地唔好再CC比自己.
2. 詐唔知, 當冇事發生過.

如果你揀1, 我諗你"too simple, sometimes naive."你唔出聲, 老細都唔敢100%肯定你收到. 不過你一reply, 就係人都知你乜都睇到曬.

我就梗係扮無知喇. 晨早收到D咁嘅email, 十點幾老細個秘書就已經打電話嚟叫我delete咗D email.

其實間公司有返咁上下大, 同事個名似都無可厚非. 不過呢, 今次就比我知道咗大老細依排都幾燥. 睇嚟公司近排生意都係麻麻地, 份bonus似乎涷過水. 唉......

彭浩翔的AV

彭浩翔可算是年 青香港導演的代表. 拍過的電影不多, 不過每一部作品都被人給予好評. 我第一次接觸到彭的電影便是他的最新出品《AV》. 故事述四個大學生, 因為想與日本AV女優天宮真奈美上床, 而騙取青年自雇基金, 假扮成人電影公司, 及收取同學費用以換取現場觀賞打真軍場面.

要說彭浩翔是香港”黑色幽 默”的代表一點也不為過. 《AV》裡的四個大學生的頹廢, 搞笑之餘亦實在發人心省. 詹瑞文雖然在戲中只是一個配角, 但是其中舅父向四人說教的一幕, 笑得人仰馬翻.

電影中彭以當年參加保釣運動的大學生作對比, 影射現代年輕迷茫及幼稚. 可是四人卻以為拍AV的荒唐事等同於為追逐理想而幹一番烈事! 其實四人的意圖早已被天宮的經理人識破, 只不過為錢份上而沒有說穿吧了. 最諷刺的是, 當又南以為自己和真宮發生了真感情, 而手扼真宮所送的護身符去上日文班之際, 嚇然發現其餘三人亦同樣地等候上堂. 年青人已為自己可以掌握及玩弄一切的時候, 就正如真奈美在電影中不斷重複的對白:「當你以為自己己成了世界的中心時，世界便開始原諒你的幼稚和無知」.