老死肥龍噚日求婚成功，真係可喜可賀．作為兄弟嘅我，會盡我所能，幫佢避開所有燒肉、薯片、汽水、自助餐、韓國燒烤等等嘅美食，務求令到佢”回復”到190磅嘅健美身型．
每一個男人都有不同嘅求婚方式．有人可以誇張到好似拍戲咁，又有人可以好似閑話家常咁輕輕帶過就算．不過就算拍拖十年，到開口嗰一刻，都可以好似第一次傾計時一樣咁緊張．
喺精心安排嘅佈局之下，唔知個個女仔嘅反應係咪都一樣嘅呢？先係不知所措，來不及比反應．之後兩個人拉扯一輪，但求男朋友快啲起身，盡快離開現場以避開路人的目光．最後無可奈何，只好答應要求，戴上戒指，將下半生拱手讓人．
其實如果拍拖有返咁上下日子，對結婚生仔都應該有一定嘅共識，開得口求婚又冇乜理由會拒絕．不過一次浪漫嘅求婚，可以令日後有個美好嘅回憶，分分鐘喚起初戀嘅感覺都唔定．
