伊朗的盧溝橋

前幾日，有報導指十五名英國海軍係伊朗水域附近被伊朗提咗．事件擾攘咗成個星期，伊朗都重未放人，又播出其中一位女兵承認擅闖伊朗水域嘅片段．英國佬就梗係耐佢唔何，而叫咗佢大佬薯仔去幫拖，於是乎美國就派咗成兩個戰艦群去伊朗附近進行軍事演習，叫做示吓威咁．

查實美國一早將伊朗列為邪惡軸心國，想打佢好耐嫁啦．依單嘢令我諗起當年日本仔嘅七七事變，話唔埋個team英軍係薯仔叫貝里雅send去嘅，好等美國有藉口去打伊朗，又有乜咁出奇！?睇怕石油價格短期內都易升難趺，係時候入返啲中石油、中海油喇．

BBC News:
http://news.bbc.co.uk/2/hi/uk_news/6484279.stm

黑與白

今日報紙講，話菲律賓有個託兒所老闆，為咗要政府小童嘅教育同住宿問題，揸住手榴彈挾持一架校巴．離奇嘅係車上面嘅學生同老師，就正正係個屬於個歹徒開果間託兒所．成件事完來都喺個託兒所老闆Jun Ducat策劃嘅．

原來果位Ducat先生早有前科，以前都曾經用假手榴彈挾持人質嘅紀錄．雖然今次又用啲咁激嘅手段去表達，但係佢嘅出發點都係為咗班細路仔，所以當地好多家長都原諒佢．不過警察就緊係唔會放過佢啦．

其實世界上咁多恐怕份子，每一個人背後都有佢嘅原因，不論係宗教、貧窮、感情，我相信唔係去到最後果步，都唔會去做啲害人害己嘅事．世界上有啲嘢並唔係非黑即白咁簡單．如果大家唔想個世界有咁多唔開心同恐怖嘅事，不妨易地而處，凡事包容啲，有時間有錢就幫吓有需要嘅人，咁化個世界就唔駛咁灰喇．

BBC News:
http://news.yahoo.com/s/ap/philippines_hostages;_ylt=AnjrrR9xS_UTBGgENly0_2VUKYUA

笑忘書

很喜歡張敬軒的笑忘書．人越大，越多煩惱．想哭，眼淚也早已流乾．

曲：張敬軒
詞：林若寧
編 : the invisible man

要背負個包袱
再跳落大峽谷
煩惱 用個大網將你捕捉
還是你 拋不開拘束
你 昨夜發的夢
到 這夜已告終
沉下去 頭上散落雨點沒有彩虹
你 還在抱著記憶就似塊石頭很重

*得到同樣快樂 彼此亦有沮喪
童話書從成長中難免要學會失望
經過同樣上落 彼此墮進灰網
沉溺 煩擾 磨折 何苦 多講*

我 快樂到孤獨
我 缺乏到滿足
遊戲 就算愉快不會幸福
人大了 開心都想哭
我 每日要生活
我 每日要鬥苦
捱下去 連上帝亦也許沒法攙扶
我 前路有右與左面對抉擇難兼顧

repeat *

擁有同樣寄望 彼此亦有苦況
棉花糖從成長中曾送你愉快天堂
經過同樣跌盪 可會學會釋放
童話 情書 遺書 尋找 答案
曾經... 曾經... 回憶當天三的波板糖

民主政制

特首選舉終於塵埃落定，結果一如所料由曾特首高票當選．出乎意料的是，一般市民對特首選舉的注目程度，似乎不下於選香港小姐或者各大音樂頒獎典禮．

自梁家傑宣佈參選開始，大家就對這位泛民主派的候選人及其政綱議論紛紛．有人認為有沒有民主並不重要，最緊要香港安定繁榮．梁家傑、余若微、長毛等人嘩眾取寵，破壞社會秩序，妖孽也．又有人認為沒有民主便沒有將來，泛民出戰特首選舉，可迫使曾蔭權加快落實普選，既可令中央掌握香港民意，亦可令香港市民體驗民主選舉，雙贏也．

誠言，民主政制並非最好的政治體制，中央集權／君主制亦不見得萬惡不赦，就好似田中芳樹的《銀河英雄傳說》一樣．《銀英傳》有漫畫、動畫，不過我最愛的還是小說版（而且科技男最怕《網球驕娃》式的公仔）．

《銀英傳》講述未來人類已經殖民於太空，不過人類對權力的貪婪並沒有改變．銀河系經歷了時代的變遷，由帝制轉為民主共和國，最後又變回帝制．故事對人性、政治、戰略皆有精僻獨到的見解．

民主、共產、極權，人類的歷史就好像鐘擺一樣，由一個極端走向另一個極端．

Black Friday

我承認我一直以嚟都冇好好咁珍惜你地． 我份人又懶， 返工又成日掛住上網， 又好逸惡勞，又．．．．．．點解你地粒聲唔出就咁樣離開咗我！？

你陪咗我大大話話都有成三十年，由細到大日日食親飯都見住你，我兩片嘴唇錫你嘅次數重多過錫我老婆，我只係一時唔小心"冼"手嗻，點解你咁睇唔開跳落街？以後食飯冇咗你我點算？

雖然阿媽啲餸唔可以稱得上珍餿百味，但係阿媽煮得咁辛苦，無功都有勞吖，所以我亦唔敢有任何怨言．點解今晚係隻死肥雞，要用絛雞骨插我個嘴咁陰毒，攪到我爆曬江?

重有你．我知，我掂你果陣時唔鍾意戴套，攪到你鬼咁殘．係都唔駛係我放工搭車訓到隻豬咁嘅時候，偷偷地就咁走咗去，又帶埋我啲friend嘅電話走．大佬呀，我平時唔用腦嫁嘛，點記得啲電話號碼嗻?

僱主聯會

如果要打工仔選出一個最乞人憎嘅組織, 我諗非僱主聯會莫屬. 正如工會天生係要偏幫打工仔一樣, 僱主聯會嘅天識就係要幫啲老闆出聲.

究竟依個香港僱主聯合會係乜嘢人攪, 有幾多個會員, 大家可以去依個網頁睇睇. 全香港有過萬間大中小企, 你做緊果間又係唔係會員之一呢?

噚日佢地就發表咗個調查, 話佢果125個會員表示, 今年會加2.9-3.1%人工不等. 嘩!有人工加好丫. 不過我想提醒大家, 喺依家香港通脹接近3%嘅時候, 加3%人工即係冇加過. 如果你公司加少過3%, 即係話佢減咗你人工!

佢地重話, 僱主要挽留人才, 唔一定要加人工, 可以諗下在職培訓, 男士產假等. 唔該啦, 在職培訓係基本嘢下話, 駛唔駛要向公司叩頭多謝呀? 男士產假? 係香港啲孤寒老細先至唔比, 外國公司一早有啦. 重有成一講埋啲乜嘢薪酬同表示掛鉤, 做高層果啲, 有功就邀, 有鑊就細嘅揹, 加人工就永遠梗係多過下面, 又唔見啲所謂僱主出聲?

僱主聯會嘅角色, 就緊係要唱淡人工加幅, 好等手下唔好隨便跳槽之餘, 老闆又唔駛惡性競爭咁加人工留人. 不過大家唔駛擔心, 驚自己老細會聽依班人豬噏. 事關如果跟足佢講, 打工嘅自然識為自己作打算, 做老闆嘅始終會受到報應, 最後咪攞嚟煩.

9型人格

之前老細無嗱嗱同我地講, 工程師通常啲communications skills都比較差, 所以叫我地同其他同事合作時要留意一下, 又同我地講解乜嘢叫做4型人格(即係9型人格嘅簡化版).

今朝無無聊聊, 就上網搵下乜嘢叫做9型人格. Seach咗成個鍾, 比我搵到依幾條links:

http://www.bt4u.com/calls/analysis/analysis4.jsp
http://www.geocities.com/gadogry/e_test1.html
http://tzemaggie.sinatown.com/main5.htm

其實唔駛做test, 都好容易估到我屬於邊種人--就係9! 雖然我都唔想接受自己係一個和平追求者, 但係果種"冷淡疏忽","無所謂","頑固"嘅性格就真係呂唔認都唔得.

點解我唔可以係藝術型或者係思考型???

Little Miss Sunshine

上個週末一口氣睇咗三套戲: 波叔出城(Borat), 戰狼300同陽光小小姐(Little Miss Sunshine). 馬拉松式咁睇, 好彩三套都幾好睇. 其實三套戲嘅故事都好簡單, 要將啲咁簡單嘅故仔拍得好睇實在難得, 所以我都幾佩服果幾位導演.

波叔出城講一個喺哈薩克做新聞報導嘅鄉下佬, 獲得政府資助去花旗國交流時嘅種種經歷. 核突, 無聊, 咸濕, 笑鬼死人. 套戲其實係想諷刺美國人果種虛偽, 種族歧視, 自大嘅性格, 難怪一套咁騎尼嘅戲都可以被提名奧斯卡.

戰狼300喺戲院睇, 音響同視覺效果一流, 漫畫式嘅拍攝手法亦好鬼死型. 雖然套片喺外國被批評得體無完膚, 但觀眾仍然魚貫入場, 此片的魅力可想而知. 套戲開始冇耐就打打殺殺, 血肉橫飛. 我一向都好怕恐怖片同鬼片, 不過依套戲拍到好似睇MTV咁, 而且咁血又係深紅色, 所以都唔係太恐怖.

陽光小小姐係一套輕鬆小品, 故事講一個妹妹仔要去參加Miss Little Sunshine嘅選美會, 一家人坐住架爛鬼福士貨van穿州過省去加州嘅經過. 個妹妹仔幾可愛, 做戲都做得幾好, 不過又未至於好到要被提名最佳女主角囉. 其實陽光小小姐係一套勵志片, 每個人都失敗過又爬返起身: 爸爸發明咗套類似"8 Steps to Sucess"嘅心法 (好似你係書局成日見到果啲), 用盡積蓄去推銷, 點知最後失敗咗, 重攪到要破產; 哥哥立志做機師, 決定考到空軍前學尼采咁唔同人講嘢, 點知發現原來自己喺色盲; 舅父係出名教授, 為咗一個移情別戀嘅男學生而自殺, 攪到身敗名裂. 片中嘅爺爺係一個癮君子, 粗口爛舌, 不過就好鍚個孫女. 爺爺係孫女嘅trainer, 教佢跳舞之餘, 又叫佢做人要有自信.

You do what you love, and fuck the rest!

聽到依句嘢, 同睇Rocky一樣咁感動. 做人如果簡單啲, 一心一意做自己想做嘅事, 向夢想進發, 又何需管結果如何呢!?

滿足感

搵咗工成個月, application寄得唔多, 冇一封有回音, 唯有繼續搵.

大家打工仔女追求嘅不外乎追求人工高福利好. 若言錢唔能夠收買你, 咁份工最起碼都要付人有滿足感, 如果唔係搵鬼做. 話雖如此, 世界上又有幾多人搵到份自己滿意嘅工呢?

有啲行業比起其他容易令人對份工有滿足感. 好似醫生律師咁, 個病人生定死, 個case贏定輸, 好快就知. 工程師呢? 好似我咁做咗成兩年幾, 先至見到有客用自己design果粒chip, 重要加少少幻想力先至"見"到粒嘢係部機入面.

依家做緊個project已經做咗成年喇, 預年底後先至派街. 唔知到時你地用緊嘅電話或者PMP入面, 會唔會有我deisng嘅嘢呢?

攝影與我

噚晚食完飯行緊返屋企嘅時候, 突然間接到朋友L嘅電話:"喂!我有部EOS 350D, 邊過掣係光圈先決同快門先決呀?". 雖然我從來未用過Canon任何一部相機, 不過我以我三分"專業"嘅知識, 再加上七分斷估就解決咗佢問題喇.

其實我自中三開始就已經玩攝影 (不過根據我老婆所講, 我係玩相機而唔係玩攝影). 當年我用盡我三寸不爛之舌, 叫阿媽比錢買咗我人生第一部相機 - Minolta Dynax 7xi. 我同阿媽講:"你借住錢比我先啦." 當然我最後亦都冇還過錢比阿媽.

買咗部相機之後, 我日日夜夜不定影呀影, 猛咁噤門快門掣. 之不過部機入面係冇菲林嘅, 因為一筒菲林要成十幾蚊, 曬相又要三四十蚊, 當年我每日食晏都係用十蚊左右咋, 邊有咁多錢買菲林吖.

到讀大學嘅時候, 我買咗我人生第二迎部想機 - Minolta Dynax 7. 點解又買Minolta? 因為我認為佢係世界上最innovative, 最user-friendly嘅相機! 好可惜依家佢已經將所有相機業務賣咗比Sony喇. 我部Dynax 7係limited edition嚟, 全世界得2000部. 幾年前我以賤價將佢賣比人嘅時候, 真係想喊出嚟.

後來我將賣Minolta所得到嘅錢, 走去買咗部Contax G2返嚟. 部機影出嚟嘅相真係靚到你唔信, 只可惜用果個人道行未夠, 未能夠將佢好好咁利用. 人越大就越嚟越懶, 部相機放起防潮箱入面得個擺字, 最後我由將佢賣咗比人, 依家剩返部數碼傻瓜機旁身. (原來我人生第一部相機Minolta 7xi重係防潮箱喎!)

突然間醒起我都有將啲相放上網, 有興趣就睇吓小弟嘅劣作啦.

http://www.pbase.com/joefung_hk

http://community.webshots.com/user/joefung_hk

好想去旅行

其實我好鍾意去旅行, 睇吓名勝古跡自然奇景之餘, 又可以享受各國美食, 真正做到"飽食終日, 無所用心"!

我個人好鍾意plan嘢, 乜鬼都要計劃一下, 去旅行都唔例外. 每一次去旅行之前, 我都會日日上網搵資料, 睇旅遊書, 計劃下住邊度/去邊度/食啲乜呀咁, 所以好多時唔係趕到隻狗, 就係走馬看花式去咗好多地方. 最緊要係maximize所花嘅錢同時間.

不過自從我去曼谷已經熟過落銅鑼灣, 同埋上次去喀比渡蜜月之後, 我發覺漫無目的咁去旅行都幾OK. 每日瞓到黃朝百晏先至起身, 鍾意隨時食就食瞓就瞓, 喜歡嘅就游吓水, 又或者就咁攤喺個沙灘曬吓太陽. 個腦完全唔需要諗嘢, 又唔駛老婆投訴話辛苦.

迎排好想去峇里島, 究竟有冇好心人比啲資料我呢?

御宅族, 工程師, 自閉症

今日睇蘋果講香港嘅御宅族, 話香港雖然表面上女多男少, 但實際上正值壯年(即20至39歲)的香港人之中, 男女嘅比例達到1.2比1, 即係話每六個港男之中, 就有一個搵唔到港女.

報紙話: "九 成 熱 愛 動 漫 畫 的 本 地 御 宅 族 沒 有 女 朋 友". 在這為數有成六十萬咁多個寡佬當中, 有幾多係御宅族就真係無從稽考, 不過我身邊嘅同事們都有一定嘅參考性. 我果team有十個人左右, 全部都屬於20至39歲依個範圍. 當中有四個已婚, 一個將於年內結婚, 睇落都唔錯, 有成一 半人結到婚. 不過有兩個未結婚嘅就有啲御宅族嘅影子喇: 冇女朋友, 覺得女朋友唔重要, 甚至認為打機睇漫畫比起女人更加重要 (起碼我冇聽過佢地講吓邊個女明星靚又或者邊個身材好咁).

咁啱蘋果就搵咗一個自稱科技大學機械工程系畢業嘅engin仔去訪問. 唔通讀工程嘅真係比較容易成為御宅族? 冇錯! 外國工程師學會做過研究, 工程師/科學家比起普通人容易有自閉傾向. 如果兩公婆都係工程師就慘喇, 生出嚟個仔好大機會有自閉症.

話時話, 我自從讀小學開始一直懷疑自己有自閉症. 如果唔係, 又點會日日寫blog嚟發洩不滿呢!?

飲喜酒

噚晚飲完一餐喜酒, 有啲嘢真喺唔講唔安樂. 我知咁樣講會得罪好多人, 又可能比人以為我懶清高, 不過我講嘅都係真心話.

中國人擺酒都喜歡熱鬧. 要搵一啲節目嚟娛賓, 攪吓氣氛亦無可厚非. 有啲人會講愛的宣言, 有啲就會大唱情歌, 肉麻得嚟又好溫馨. 但係唔知由幾時開始, 啲人鍾意喺個婚宴上攪埋啲現金抽獎! 一人攞一一佰幾十出嚟, 最尾抽到果個就可以攞曬啲錢走.

請人嚟飲, 除咗係要滿載阿爸阿媽姨媽姑姐之外, 無非係想同人分享新婚嘅喜悅. 將餐喜酒攪到好似電視啲遊戲節目咁又何必呢? 果啲隔離鄰舍同埋萍水相逢嘅同事悶就預咗嫁啦，根本冇需要去特登去take care．我明白唔係個個人都可以或者希望擁有一個童話式嘅婚禮，但係攪埋曬啲乜嘢抽獎只會令成件事變得俗氣．

中國人好賭嘅性格真係發揮的淋漓盡致．

工程師與外星話

唔知點解, 喺香港畢業嘅engin仔, 好多人中英文都唔多掂.

可能你會話, 做engineer, 數理叻未得囉. 冇錯, 以前我好多同學A-level攞三個A, 依家身邊好多同事都係碩士博士, 不過佢哋一開口講嘢, 你就真係想笑出嚟.

公司好多客都喺日本韓國美國, 我哋又有分公司喺第二度, 好多時開conference call, 啲engin仔一開口, 你會以為自己去咗火星聽到外星人講嘢! 奇就奇在, 對方好似完成明白佢講緊啲乜, 久而久之我就開始覺得其實我啲英文先至係叫做差.

普通話又係一絕. 有啲同事講國語, 同講廣東話真係聽唔出有乜分別, 求其張個音讀"mee"啲就叫做國語, 好難忍得住唔笑. 不過又好奇怪, 啲內地同事又聽得明噃! 吹脹.

就算用返廣東話都唔好得好多. 講嘢詞不達意, 有佢講冇你講. 平時傾計又冇幽默感, 講笑又當真, 明明講緊無聊嘢又以為講認真, 想死.

西裝

細個嘅時候, 我覺得著西裝嘅人好奇怪: 點解夏天咁熱重要著住件咁厚嘅衫通街走?

於是乎我立定決心, 第時大個我一定要搵份工係唔駛著西裝嘅. 試諗吓, 大熱天時成三十幾度, 烈日當空下全身濕透果種感覺係幾咁痛苦. 依個諗法, 唔多唔少影響到我依家做咗工程師嘅決定. 做工程師可以日日牛仔褲+波鞋, 連Bill Gate都只係恤衫一件唔駛打呔. 揹背囊返工, 好過單手拎工事包啦.

不過人越大, 就越對西裝有種情意結. 買到一套合身嘅西裝, 著咗上身個人都開心啲. 當著起套西裝去見工嘅時候, 唔知點解個人嘅自信心都強啲. 你可以話我膚淺, 不過當我著起西裝, 拎住工事包係中環行嘅時候, 我真係覺得前途一片光明.

其實以前對西裝友嘅"偏見"都幾無知. 第一, 西裝友大部份時候都坐係office, 尤其係中環果啲, 頂多行過隔離楝大廈見客開會, 比大陽曬到嘅時間近乎零. 第二, 係香港搵到錢嘅工都不外乎醫生律師銀行家等西裝友, 返工著住牛記笠記, 啲人唔係以為你放假, 就係你撈得好霉. 第三, 西裝來來去去果啲款, 只要買多幾件恤衫, 返工就唔駛成日諗著乜衫好啦.

汽車防撞系統

近排成日有因貨車倒後而引致行人受傷甚至死亡的事件, 有人就提出香港應該效法外國或者祖國咁, 強制車輛安裝汽車後視系統, 令司機倒車時可以從螢幕睇到車後面的情況.

雖然我好贊成依個建議, 因為除非有跟車睇水, 否則貨車司機好難睇到車尾有冇障礙物. 不過個系統有個drawback, 就係司機要昅實個mon, 好可能反而忽略咗前面同左右兩邊, 真係前又死後又死.

係我腦入面, 有一套motion detection系統, 用黎輔助個汽車後視系統. 依個系統同後波雷達相似, 主要利用幾個小型camera, 安裝係車嘅四隻角. 鏡頭會傳輸車四周嘅影像到電腦, 當電腦偵測到附近有物件移動, 就會警示司機同將映像display出黎, 咁司機就可以一眼關七喇.

依個系統亦可以令汽車駛過十字路口或者小路出大路時安全啲. 就係當系統detect到前面有車輛高速橫過時, 擋風玻璃上而面就有張架車用個紅圈圍住, 加埋BeeBee響聲, 充就可以避免A柱對司機做成嘅盲點位. 不過依個系統要配合一個投映系統, 將畫面display係玻璃上面. 不過我諗依種顯示技術, 都要過多幾年先有喇.

777 + 911

唔係中咗Jackpot, 又唔係恐怖襲擊. 不過刺激過中Jackpot, 又驚嚇過恐怖襲擊.

今日恆生指數跌咗777點, 期指跌咗911點. 短短個多星期恆指累積跌幅已經超過2千點. 唔係要認叻, 但係我二月已經講到明H股嚴重超買, P/E處於歷史高位, 必有調整, 建議各位換馬防守性強的公用股. 不過我冇諗過嘅係, 恆指成份股中, 好多都唔算貴, 但係今次全球跌市中亦無一幸免.

依幾日跌市, 雖然成交都唔細, 但係後市就未宜太樂觀, 唔建議現階段撈底. 不過不妨留意中壽, 中石油等國企, 等跌定後吸納.

係forum度見好多人都話上年贏果D已經冇哂, 甚至輸突. 如果你唔係高追, 買三四線股仔, 或者炒輪, 其實都唔係太傷. 記住:千其唔好炒輪! 如果你冇讀過Financial Engineering或者深入研究過乜嘢係warrant, 其實去澳門贏錢嘅機會率重高, 因為同你對賭緊嘅, 係一班金融業嘅精英, 分分鐘係MIT/Princeton既Maths PhD.

買咗匯豐銀行嘅, 唔駛擔心, 因為我都坐緊艇!

日本櫻花

到日本賞櫻, 一般香港人都會到東京或者京都大阪. 一來香港人對這兩個地方較為熟悉, 二來兩地都是大城市, 搭賞櫻之餘更可以順便血拚一下, 可謂一舉兩得. 可惜今年天氣較往年溫暖, 櫻花開花的時間亦應該較往常早, 好像東京大阪等地方在三月中旬便會開花. 若然打算趁復活節到東京賞櫻, 恐怕要失望而回了.

其實, 日本東北及北海道同樣是觀賞櫻花的好地方, 當中青森又有"東北京都"之稱. 東北地區櫻花盛開的時間一般比東京大阪等南方城市早. 青森雖然沒有大阪城式的江戶建築, 不過亦有不少日本寺廟, 在漫天櫻花之下亦同樣充滿詩情畫意. 青森出名種植大蘋果, 就像我們常指的日本溫室蘋果一樣大! 到青森旅遊不妨試試這個東北名物.

要到青森, 可乘坐JAL到仙台再轉火車, 或者從東京坐三個多小時的子彈火車到達.

廣告+免費電話

毫無疑問, 手機廣告將會成為廣告公司的下一個目標.

傳統廣告收入萎縮, 互聯網又被Google獨大, 基於藍海策略, 廣告商必須找尋新的盈利點. 現時, 每年手機增進率仍維持於雙位數以上. 而且在許多發達市場, 手機覆蓋率高達90%, 比起電視, 報紙雜誌甚至電腦為高. 而且人們通常長時間開啟手機, 比起看電視或用電腦的時間為多. 因此利用手機作為傳播媒體, 所能夠接觸到的群眾更多更廣泛.

再者, 電訊服務收費逐漸下降, 手機廣告的成本亦隨之而降低. 除了使用舊式的SMS作傳送之外, 更可以MMS或者類似RSS的方式發佈. 無論如何, 總比電腦錄音的廣告來電更加有效吧.

不過, 如何可以令手機使用者心甘情願隨時隨地接收廣告呢? 試想想, 為什麼我們願意接收電視或者報紙雜誌上的廣告呢? 正因為廣告商補貼電視台及出版商, 令這些媒體的成本大幅降低, 甚至免費, 我們才容許大量廣告圍繞住我們. 如果電訊商提供免費電話服務, 或者超低電話月費, 相信必定能吸引手機用家願意接受手機廣告以換取免費, 或是近乎免費的通信服務.

如果我是蘋果, 必定隨著iPhone的發售, 推出免費手機服務作招來. 一來iPhone已經為公司帶來可觀的收入, 二來購買iPhone的用戶, 利用聽mp3或者看電影的時間可能比起電話更多, 免費電話應該不會為蘋果帶來財政壓力. 而且, iPhone有個大畫面, 亦令廣告公司有更大的靈活性去做出不同類型的廣告.