咖啡

我好鍾意飲咖啡, 曾經試過一日飲兩三杯, 不過自從上次胃痛入醫院後, 依家一個星期係一杯起兩杯止.

係好耐好耐之前, 八佰伴有間叫"糧友"(註)既日式咖啡店, 裝修得好靚, 中間有個bar枱, 旁邊有幅落地大玻璃, 可以一邊飲嘢一邊望吓街. 我記得以前一個tea set, 有一件蛋糕一杯嘢飲, 要成十幾廿蚊. 十幾年前對於一個學生哥嚟講好多錢嫁喇, 所以我都係耐唔耐屈阿媽請我先有得去.

每次去到, 我都會比bar枱上果啲Syphon(中譯:虹吸式咖啡壺)吸引住. 果陣時對咖啡知道嘅唔多, 頂多聽過藍山咖啡好貴, 同去茶餐廳時會叫杯凍啡. 個coffee syphon分上下兩個玻璃球, 先將凍水放入下面個壺, 然後將咖啡粉放在上層, 再用酒精將水燒熱. 滾咗嘅水就會被吸上上層和咖啡粉混合, 冷卻後會水滴返落下面, 一杯咖啡就咁完成. 我每次去到, 例牌眼定定望住依個過程, 幻想自己有朝一日可以買返個係屋企玩吓.

冇幾耐之後, 有人送咗一個咖啡機比我, 係大家喺電器鋪最常見到果種. 依種咖啡機用嘅方法叫filter drip或者auto drip, 就係將啲水煮熱(或者變成水蒸汽), 再淋向咖啡粉上而等佢慢慢滴落嚟. 講真, 我覺得drip coffee係世界上最難飲嘅咖啡. 一來啲咖啡好似水咁, 二來個filter好容易整到啲咖啡有怪味. 不過依種咖啡係美國好流行, 就係你向Starbucks或者Pacific Coffee可以叫到嘅Americano喇. (美國人鍾意食垃圾係人都知)

大個咗之後, 發現到有一樣嘢叫french press. 依種壺除咗可以沖咖啡外, 重可以攞嚟沖茶. 用嘅方法好簡單, 只要將咖啡粉放入壺中, 加入熱水等兩至三分鐘倒返出嚟就得. 由於水同咖啡接觸嘅時間比較長, 因此沖出嚟嘅咖啡亦會比較"哽". 用french press最難嘅地方係, 如果咖啡磨得太粗就唔出味, 磨得太幼嘅話就隔唔到啲咖啡粉, 攪到成口渣. 因為咁, 我就走咗去買一個手磨咖啡機, 買啲咖啡豆返嚟自己磨, 等我可以控制咖啡粉嘅粗幼度.

出嚟做嘢之後, 飲得最多嘅就係即溶咖啡. 依家公司只係提供最cheap果隻雀巢咖啡, 好話唔好聽同飲垃圾水冇分別, 比少少錢買罐雀巢金牌咖啡好過. 曾經試過一款Cap Columbie, 一般超市可以買到. 佢味道比較濃, 最啱晨早提提神.


自從引入咗Starbucks之後, 香港人就多咗嘆咖啡依樣習慣. 好多人話Starbucks唔好飲, 又話連鎖店好飲極有限咁. 計我話响未有Starbucks之前, 大部份香港人連espresso係乜都未必知, 到依家個個識得叫latte, cappuccino, Starbucks都有佢嘅功勞. 至於Pacific Coffee, sorry, 真係冇乜邊間好飲, 唯一吸引之處就係佢啲紅色梳化.

就係因為Starbucks, 令我認識到意大利咖啡. 冇錢買部幾千蚊嘅espresso機, 唯有買個窮人咖啡壺-Bialetti Moka Express. 聽聞依種咖啡壺每一個意大利人屋企都有一個, 真定假就無從稽考, 不過花少少錢就可以隨時响屋企飲到杯好味嘅咖啡, 真係一樂也. 為咗可以整杯夠滑嘅latte, 我仲特登買咗個奶泡器, 可以用係微波爐嫁.

註: 原來間咖啡店係叫"糧友", 並非"良友". 多謝路人A指點.

工作與寫Blog

尋日搵到一個叫WorkSmart嘅網頁, 係英國一班工會, 用嚟傳達一啲訊息比打工仔. 當中有個topic叫"Blogging and Work", 內容大慨係要提醒打工仔如果工作上嘅人同事寫係blog度時要小心啲. 其中有人段咁寫:

"Blogging about existentialism or football may be harmless, but discussing your boss, your colleagues or any aspect of your work could lose you friends, cost you your job and even land you in court facing a defamation suit."

我都成日寫公司啲嘢, 死火! 重有, 睇得我個blog啲人都知我係邊個, 萬一我寫啲嘢揚咗開去比同事睇到咪大鑊??? 不過諗真啲, 依度個hit rate近乎零, 邊有人會睇到丫. 怕且我係公司比老細睇到我偷懶寫blog嘅機會仲高啲.

對酒當歌

一個月一次, 都唔過份啫.

上嚟工作已經幾年, 不過我重來未試過同同事去Happy Hour, 一嚟公司喺冇雷公咁遠, 二嚟我啲同事都好geek(咁我呢??), 深閨簡出, 更加唔駛指意叫佢地去飲酒(約打機可能易啲).

其實我唔鍾意飲啤酒, 因為有陣啤酒花味, 而且我飲完啤酒第二日一定頭痛. 紅酒就唔錯喇, 甜甜地幾好飲, 而且唔駛驚頭痛, 點"辟"都得. 我最喜歡Merlot, 有果味易入口; 其次係Shiraz, 辣辣地送羊扒一流. 唔識欣賞Cabarnet Sauvignon, 因為買唔起啲貴酒, 平果啲通常單寧酸太多, 好難入口.

咁大個仔都未飲過啲乜嘢Long Island呀, Snow Ball呀之類嘅cocktail, 因為烈酒都好難飲, 又會令我頭痛. 不過Bailey就幾好, 可能因為我好鍾意飲咖啡啦, 而且佢又夠甜.

我覺得一路食嘢一路飲酒都唔錯, 食下雞翼bbq之類, 送吓酒, 傾吓計. 真係對酒當歌, 人生幾何!

蒸餾水

點解我係公司成日要負責換蒸餾水?

我果邊有成三四十個人, 九成係男人, 點解我差唔多日日都要換水?有時重試過一日換兩次. 一支水有18.9公升, 我一日頂多咪飲1公升, 一支水可以飲成兩個禮拜有多. 如果要我一日換一次, 咁咪即係十個人有九個半都唔換水! 以此推算, 成個department來來去去可能都係得果幾個人會換水.

究竟d男人係跛咗定係廢咗呢!?

陳振聰

查實，我覺得條友十年前幾似張耀揚，一年前又好似顏福偉．

究竟佢靠乜嘢起家？係做地產定睇風水？依一切都唔重要．不過我可以肯定，Tony Chan依個人一定好聰明．話曬係加拿大讀完醫，智商都有返咁上下．要炒豪宅，幫大有錢佬睇風水，人脈／／口材／眼光缺一不可．

我唔相信降頭依味嘢．風水對於我嚟講，係中國人千百年以來將心理學同建築學用統計學溝埋一齊嘅結晶品，太過偏門就有違科學精神．姓龔果班人要怪就怪龔如心係最脆弱嘅時候，只有陳振聰"相信"王德輝重未死，重同佢週圍去求神拜彿．十幾年嚟儲心積累咁鋪排，真係少啲耐性都唔得．

爭產官司又會唔會好似龔如心同佢老爺果單打咁耐呢？就憑陳振聰立即搵咗之前幫龔如心打贏官司絛友做代表律師，又扮神秘人咁，就知佢有料到．睇怕果一千億遺產，佢係志在必得．

校園鎗擊案

前日美國又有校園鎗擊案，今次係發生喺Virginia Tech，凶手係一名讀英文系嘅韓國裔學生，大大話話殺咗成三十二個人．講真我唔係幾明今次單嘢點解好似特別大件事咁，殺一個又係殺，殺三十二個又係殺，依啲事喺美國耐唔耐都有嫁啦點，點解死咁多人先至關心多啲，平時果啲就係咁二報導吓就算數？人命嚟嫁喎？！

重有，因為個凶手係韓國裔移民，就攪到南韓依家好似好冇面，好內疚咁．大佬，人地一家人一早已經入藉美國，係美國人嚟啦！關啲亞洲人乜嘢事？不過由最初"誤報"凶徒為中國人，到後來大家開始關注亞裔移民，唔多唔少睇得出美國人對亞洲人嘅敵意．

美國文化真係千奇百怪，件事發生後，居然有人走出嚟話如果啲學生一人一鎗咁返學，就唔會死咁多人．人人揸支鎗，可能一次真係唔會死三十二個，之但係同類型事件會唔會因此而多咗呢？有人會話，有鎗都唔代表會用遮．但係權力可以令人腐化，當別人嘅生殺大權操縱係你手入面，你又可唔可以時刻保持頭腦清醒呢？

如果你有興趣嘅話，可以去睇睇果位殺手所寫嘅一份劇本《Richard McBeef》．睇完之後，我都feel到佢真係幾”喪”．唔係因為個劇本嘅內容，而係因為佢居然寫啲咁嘅嘢就想交功課，我諗佢真係有啲問題．

關西之旅2007 - Day 4

Day 4 大阪 <-> 奈良

原本打算今日留在大阪四圍逛，後來發現大阪附近的奈良公園有鹿仔，況且大阪其實除了買同食之外都幾悶，於是花了一個上午遊覽奈良．

在難波可以坐近鐵到奈良(740Yen)．其實要到奈良，可以在大阪站坐JR，不過在難波迎坐近鐵不用轉車，而且近鐵奈良站亦比JR奈良站接近奈良公園．

由近鐵奈良站步行十分鐘左右就到達奈良公園，公園門口早已經圍著一群小鹿．沿途有很多售賣餅乾的攤檔，可以買一份(150Yen)餵鹿仔．當鹿仔見到你手上的餅乾便會一湧而上，小心被嚇倒！

我們漫漫走向東大寺，東大寺在1998年被列為世界文化遺產（看其破舊的大門！）．今次我們並沒有入寺廟參觀，因為進入東大寺要收費，而且前兩天已經去過不少寺廟，心想應該大同小異吧．

繼續在公園內漫步，奈良的櫻花比起京都的不遑多讓，尤其在小鹿的襯托之下，更加有田園風味．在櫻花樹下坐坐，享受一個充滿陽光的上午，人也變得懶洋洋．

離開時還看見鹿BB要喝奶．

走出奈良公園後我們便前往JR奈良站，準備到大阪的梅田區shopping，不過JR火車站比起迎鐵的遠得多了，可能坐近鐵回難波再轉地鐵到梅田還比較省時省力．

Day 5 大阪 -> 香港

早上十點鐘乘CX回香港，結束了今次關西賞櫻之旅．

關西之旅2007 - Day 3

Day 3 大阪 <-> 京都

今日又再去京都賞櫻．今次我們在梅田站坐JR住京都，雖然比起阪急貴(540Yen vs 390Yen)，不過車程縮短了十多分鐘，而且火車的座位也比較舒適．

到了京都站，我們先買了巴士一日劵．這張乘車劵可於一日內無限次乘搭京都的巴士，只需要500Yen，比起單程車費要220Yen，這張乘車劵實在便宜．

第一個景點是清水寺．這間寺院依山而建，佔地甚廣，在櫻花季節還有夜櫻觀賞．雖然我們今次剛好錯過了夜櫻的開放期間，不過日間的風景仍然十分美麗．

之後我們再乘巴士到祗園，穿過八坂神社，走到圓山公園．盡管賞櫻高潮已過，仍然可以見到一堆堆日本人席地而坐，一邊飲酒一邊玩遊戲．

遊園之後我們再坐巴士到銀閣寺，途中經過京都博物館，見到櫻花處處，這時一日乘車劵的效力又再發揮，我們毫不猶豫便跳下車！博物館被一條小河圍著，遊客亦可乘小船沿河觀光．

短暫停留後便繼續前往銀閣寺，到步後先在寺前一間小店吃個豬扒飯．

銀閣寺主要以園景為主，地方比起清水寺小得多．

步出銀閣寺，我們便走到哲學之道．哲學之道其實是一條沿小溪而建的石板路，據說種了450株櫻花樹．走在櫻花海之間，有種說不出的感動．

走畢哲學之道，便坐車到四条河源町，事關有人昨天未能盡興，要繼續血拚云云．回大阪前我們在魚心壽司食晚餐．這間壽司店在關西地區有幾間分店，以中價及大件壽司作招來．大大隻赤貝加上只售1000Yen的海膽，那種新鮮的味道及口感，彷彿到現在仍然能感覺得到．不過由於每件壽司都大大件，我們只吃了七碟，合共6700Yen，抵食！

關西之旅2007 - Day 2

Day 2 大阪 <-> 京都

今天的節目是往京都的嵐山嵯峨野．晨早起身，當然醫好個肚先．不過依我的經驗，日本人要不是不吃早餐，就是習慣在家中吃完後才上班，想要在日本食火腿通粉+煎蛋都幾難，所以我們就隨意找間連鎖快餐店Lotteria食早餐．日本有很多漢堡飽店，Mos Burger、First Kitchen等等，McDonald反而比較少見．

食完飽後步行至地鐵御筋堂線心齋橋站，坐阪急京阪線往嵐山(390Yen)．到達後我們打算先在附近逛逛，然後才去坐今日的主角－嵯峨野小火車．

我們先走過渡月橋，經過中之島公園，然後圍繞嵐山、嵯峨野走一個圈．這個時候京都的櫻花都已經盛開，中之島公園有很多株櫻花樹，漫天飛花，心想總算不枉此行．走著走著，經過了一間間故舊的寺廟，又穿過一道竹林．

差不多下午一點，走到嵯峨嵐山站買火車飛住龜崗(600Yen)．坐嵯峨野小火車最好的位置是第五卡的右邊座位，因為這一個車卡是開放式的，而且保津川就在路軌的右邊．可惜事與願違，這些”皇帝位”一早售罄，不過沒所謂吧，反正這架小火車就是一個賣點．

火車到達龜崗後，停留幾分鐘就會沿途折返，不過我們並沒有買來回車票，因為我們打算從龜崗附近的JR馬堀站坐火車到二条城(230Yen)．這樣可以不走回頭路之餘，亦可欣賞到沿途漂亮的櫻花．

到達JR二条站時已經是下午四時左右．由於還沒有吃過午餐，我們就在站外的Mos Burger用餐．原本打算遊覽二条城，不過關門時間已到，我們只有在城的旁邊走走，跟著坐巴士到四条河源町(220Yen)，再轉阪急回大阪．

晚餐試了旅遊書上介紹的迴轉壽司放題，男士1600Yen左右，女士則只需大慨1200Yen．壽司款式不多，而且味道亦普通，只不過是任食罷了．

關西之旅2007 - Day 1

Day 1 香港 -> 大阪

今早十點鐘坐CX出發往大阪，三個小時左右便到達關西空港，再轉乘南海電鐵空港線往難波站(890Yen)．

今次關西之旅，全程入住位於大阪難波區的Hotel Riva．要遊覽關西，如果時間不多，可以大阪為中心，因為由大阪前往其他地區如京都、奈良、和歌山等，只需要少於一個小時的車程．

步出難波站，人生路不熟，從地圖上也找不到酒店的位置．突然有位日本哥哥仔，心口掛著"tour guide”的牌，上前表示可以帶我們到酒店．這位”導遊”先生又英文又普通話，好不熱心，不過代價是要付上500Yen(學生300Yen)作報酬．遇上我這種貧民，當然一口拒絕啦，不過”導遊”先生都好客氣回應一句"it's ok"．

放棄了伴遊服務，唯有靠自己．走呀走，日本的商店街錯綜複雜，要摸上另一間酒店的reception問路，才確定到酒店的所在位置．Check-in之後上房，發現房間比想像中好，而且還有個大浴缸．其實這間酒店剛剛裝修完畢，房內外都非常新淨，以價論貨，十分抵住．

放下行李，已經接近下午四時．甫出酒店便是千日前通、道頓堀．我們走進有名的蟹道樂食長腳蟹大餐(4935Yen)．初時見餐牌上每一個餐入都份量十足，加上要留肚給其他美食，於是兩個人只叫了一個套餐．後來發現套餐中的項目雖多，但全都十分”的式”，好彩尚可填滿兩個人的肚．蟹肉刺身出期地鮮甜，豆乳鍋味道亦一流，難怪這間食蟹專門店可以開到成行成市．

餐後再在附近閒逛，各式商店琳瑯滿目，不過可能並非假日，人沒有想像中的多（至少不似東京那麼恐怖）．道頓堀有很多賣章魚丸的鋪頭，花多眼亂，我們就選了最出名的一家試試，味道果然不錯．逛到差不多十點左右，返酒店之前再去人氣的金龍拉麵，叫了兩碗小的叉燒拉麵(600Yen. 大的900Yen)．金龍拉麵只賣一款拉麵，說真得我不覺得有什麼特別，湯和叉燒都普通過普通，唯一的特色就是那些紅色的枱椅罷了．

關西櫻花之旅

去咗日本關西四日, 睇咗好多櫻花, 總算不枉此行. up住兩張相先.

軟件推介 - Ghostzilla

講開office上網, 今日睇到本雜誌介紹咗一個軟件, 實在直得向大家推介.

大家喺公司上網嘅, 係咪要鬼鬼祟祟, 成日要禁Alt+Tab呢? 依個program就可以將個browser扮成Word咁, 將網頁嘅內容轉為黑白. 就算老細唔覺意睇到, 都可以搏佢時運高而以為你喺度打緊字.

個software叫ghostzilla.

明年今日

6:30am 起身
7:05am 出門口．以九秒九趕搭村巴
8:15am 返到公司．食麵包．睇蘋果
8:45am 睇東方，太陽
8:55am 做嘢．上網．斟水．做嘢．上網．斟水
12:00pm 食飯
1:00pm 睇星島．吹水
1:30am 做嘢．上網．斟水．做嘢．上網．斟水
6:25pm 走人．以九秒八九跑去搭村巴
7:30pm 返到屋企．食飯

你地唔悶我都悶．