假日郊遊好去處

科技男每朝晨咁早就要去科學園返工．科學園位於沙田同大埔中間嘅馬料水，一個平日人煙罕至嘅“山卡啦”地方．响依度返工，最慘係冇啖好食．比較正常嘅係一間叫《喜慶》嘅酒樓，佢嘅流沙奶皇飽真係掂，奶黃嘅甜味同蛋黃嘅鹹味平衡得好好，餡汁熱辣辣，唔會乾爭爭咁．依間酒樓係西鐵元朗站有分店，得閒可以試吓．

近幾日，整咗成年嘅海濱走廊終於完工．以前細路仔嘅時候，由沙田踩單車去大埔，吐露港旁邊只係一個大海，沿途有乜地方可以休息，大熱天時都幾攞命．而家嘅吐露港單車徑，有涼亭又有公園，爭在未有雪糕車同魚蛋檔，以後一家大細又多個地方去玩喇．

為咗唔好比自己個肚腩不斷壯大，好多時食完飯，我都會去海邊行吓，順便曬吓太陽，吸收維他命D．海濱走廊開放之後，我就唔駛再圍住個地盤食塵．尤其是依幾日陽光普照，响海邊食吓風，睇吓啲熱到死都重要踩單車嘅年青男女，個人都開心啲．

今日重有個開心大發現，就係之前封住咗嘅望遠鏡終於有得玩喇！個望遠鏡係Nikon做，一睇就知係好嘢．一望之下，發現連船灣淡水湖開面有人玩風帆都睇到，風水地比華利山啲屋又睇到，連對面馬鞍山啲人換衫都睇到．唔知馬鞍山啲居民知道後，會唔會抗議呢？