我諗對於大部份男人嚟講, 一粒鑽石同一舊炭真係冇乜分別. 弊在係女人眼中, 鑽石係有一種無可替代嘅地位.
雖然我冇睇過里安納度套"血鑽", 亦都冇深究過套戲入面所講嘅故仔有冇作大, 不過我就好認同每一粒鑽石背後都係有血有淚. 無論粒鑽石係老公/男朋友買比老婆/女朋友, 抑或係D女人買比自己, 諗起比咁多錢買粒丁屎咁細嘅石頭, 個心點都會有D嗱住嗱住.
係我未買隻介指向我老婆求婚之前, 我都花左D時間去研究鑽石依樣嘢. 乜嘢係4C呀, Girdle呀, GIA呀, 上網睇左一輪, 又去D鋪頭混下吉, 好似識好多咁. 求婚喎, 要買就梗係買最好嘅, D Color, VVS1, 56% table唔少得啦. 點知去到間鋪頭一問, 嘩!真係要發左達先比得起, 仲要訂貨添呀. 冇計啦, 唯有退而求其次, 細粒D, 色低D嫁啦.
我果晚坐左係間金行成晚, 由六點幾坐到十點幾成四粒鐘, 初初粒粒石都睇唔上眼. 個sales一時叫人幫我係旺角攞D石過嚟, 一時又係尖沙咀攞D石過嚟, 成個大客咁, 最後揀到粒滿意嘅, 又要講一輪價. 講真其實我都幾唔好意思, 又唔係買粒幾卡嘅巨鑽. 隔離D自由行買十幾廿萬嘢, 唔駛三個字就搞掂, 我依D細客仔, 買果少少嘢, 阻左人地成晚, 真係冇陰公.
最後當我比左錢, 攞住隻介指走嘅時候, 個心就只係希望我果半年人工唔會就咁白費啦.
